Ekpe alǵysy keletinder qatary qalyń – elordalyq dáriger

NUR-SULTAN. QazAqparat - Nur-Sultan turǵyndarynyń basym bóligi koronavırýsqa qarsy vaktsına alǵanyna qaramastan, ekpe alýǵa kelýshiler qatary áli de saıabyrsyǵan joq, dep habarlaıdy QazAqparat qala ákimdiginiń resmı saıtyna silteme jasap.

Elordadaǵy №7 emhana dárigerleriniń aıtýynsha, búgingi tańda COVID-19 vaktsınasyn negizinen medıtsınalyq ruqsaty bar naýqas azamattar, sondaı-aq onyń tıimdiligine kóz jetkizip, vaktsınany alýǵa bel býǵan adamdar alady. Kúnine orta eseppen 100 adam vaktsınalanady.

«Vaktsınatsııa áli de jalǵasyp jatyr. Nıet bildirgenderdiń bárine ekpe salamyz. Biz aýmaqtyq emhanaǵa jatatyn adamdardyń 88% astamyn vaktsınaladyq. Sondaı-aq, emhanaǵa tirkelmegenderdi de qabyldap jatyrmyz. Keshe 65 adamdy birinshi komponentpen jáne 29 adamdy ekinshi komponentpen vaktsınaladyq. Ekpe alýshylar qatary qalyń», - dedi №7 qalalyq emhananyń terapevti Álııa Óskenbekova.

Ekpege keletinder arasynda 18 jastaǵy jastar da, 60 jastan asqan azamattar da bar.

«Uzaq sheshim qabyldaıtyndardyń birimin desem de bolady. Ekpe alý týraly sheshimge kópten beri kele almaı júrdim. Biraq búgin ekpe alýǵa bel býdym. Týystarym men tanystarymnyń bári derlik vaktsınatsııadan ótti», - dedi elorda turǵyny Artem.
Aıta keteıik, búginde Nur-Sultanda koronavırýs vaktsınasynyń birinshi komponentin 450 myńnan astam azamat qabyldady, al 416 myńnan astam adam tolyq ımmýndaýdan ótti.

Pandemııamen kúresýdiń jalǵyz tıimdi ádisi – vaktsınatsııa arqyly ujymdyq ımmýnıtetti damytý.