Ekonomıkalyq ósý jónindegi shtabta iri ınvestıtsııalyq jobalar qaraldy
ASTANA. KAZINFORM – Ekonomıkalyq ósý jónindegi shtabta KEGOC, Qazaqtelekom jáne Samuryq-Energonyń iri ınvestıtsııalyq jobalary qaraldy. Bul týraly Úkimettiń baspasóz qyzmeti málim etti.
Eldiń ekonomıkalyq ósýin qamtamasyz etý jónindegi jedel shtabta Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen elimizdiń iri energetıkalyq jáne telekommýnıkatsııalyq operatorlary «KEGOC» AQ, «Qazaqtelekom» AQ jáne «Samuryq-Energo» AQ-nyń ınvestıtsııalyq jobalary Qazaqstan ekonomıkasynyń jalpy qosylǵan qunyna (JQQ) qosqan úlesi turǵysynan qaraldy.
KEGOC: aýqymdy ınfraqurylymdyq jobalar jáne otandyq qamtý
«KEGOC» AQ qazirgi ýaqytta Qazaqstan BEJ ońtústik aımaǵynyń elektr jelisin kúsheıtý jáne Batys aımaqty BEJ-ben biriktirý sekildi eki negizgi jobany iske asyrýda. Osy jobalar sheńberinde 2025 jyly 66,7 mlrd teńgeni ıgerý josparlanýda. Qarajat qurylys-montajdaý jumysyna, jabdyq satyp alý men jetkizýge, jobalaý-smetalyq qujattama ázirleýge, t. b. qyzmet túrine jumsalady
KEGOC basqarma tóraǵasy Nábı Aıtjanov atap ótkendeı, materıal men jabdyqtyń 92%-yn otandyq óndirýshiler jetkizedi. Al qosalqy stantsııalardy salý kezindegi jergilikti qamtý úlesi 64%-ǵa jetedi. Demek, bul jobalar eldiń JQQ-na eleýli úles qosyp otyr degen sóz.
Qazaqstannyń biryńǵaı elektr energetıkalyq júıesin ornyqty damytý úshin «KEGOC» AQ uzaq merzimdi jobalardy iske asyryp otyr. Olardyń ishinde jalpy uzyndyǵy 8568,4 shaqyrym bolatyn 220-500kV 95 joǵary voltty jelini kezeń-kezeńimen qaıta jańartý, Qazaqstannyń ońtústigindegi elektr energııasyna qajettilikti jabý mindetin sheshýge baǵyttalǵan Qazaqstan BEJ tranzıttik áleýeti men ótkizý qabiletin arttyrý jobasy bar. Astanany elektrmen jabdyqtaýdy kúsheıtý, Qaraǵandyda qosalqy stantsııa, Astanadan Qaraǵandyǵa deıin 500 kV JK salý, Qaraǵandy — Jezqazǵan — Qyzylorda — Shymkent 500 kV JK, uzyndyǵy 800 shaqyrym Qarabatan QS — Beıneý QS — Mańǵystaý 500 kV QS jelilerin salý arqyly Batys energııa torabyn kúsheıtý.
Sońǵy kezeń 2035 jylǵa deıin eseptelgen Batys aımaqty Qazaqstan BEJ-men biriktirý jónindegi joba bolmaq. Ol Qazaqstannyń energetıkalyq júıesin toqaılastyryp, keleshekte Kavkaz — Ortalyq Azııa energetıkalyq dálizin iske asyrý úshin jaǵdaı jasaýǵa múmkindik beredi. Joba «Batys-Ońtústik» turaqty tok jelisin salýdy kózdeıdi. Barlyq joba josparly iske asyrý merziminen buryn oryndalady.
Qazaqtelekom: 5G jáne óńirlerdegi talshyqty-optıkalyq qurylys
«Qazaqtelekom» AQ tórt iri ınvestıtsııalyq jobany iske asyryp jatyr:
— Astanada jasandy ıntellekt, elektrondyq úkimet jáne tsıfrlyq bıznes ınfraqurylymynyń negizgi elementi, quny 14,28 mlrd teńge bolatyn data-ortalyq salý.
— 2028 jylǵa deıin 88 qala men 128 aýyldyq eldi mekendi qamtıtyn FTTH (talshyqty-optıkalyq qurylys) jelisin ornalastyrý. Jalpy bıýdjet — 45,3 mlrd teńge.
— Quny 65 mlrd teńge bolatyn 5G («Ksell» jobasy) jelisin keńeıtý. Joba IoT, telemedıtsına jáne aqyldy qala tujyrymdamasyn engizý úshin negiz.
— QR aýyldarynda 1,5 myń aýyldyq mektepti, 2,1 mln memlekettik mekeme men 60 myńnan astam abonentti qamtıtyn 2028 jylǵa deıin quny 175 mlrd teńgeni quraıtyn AEM TOBJ 2.0 qurylysy.
Samuryq-Energo: energetıkalyq ınfraqurylym salý
«Samuryq-Energo» AQ 32 ınvestıtsııalyq jobany iske asyrýda. Onyń 14-i óte iri. Kompanııa sondaı-aq Qonaev, Alataý qalalary men aglomeratsııany damytý úshin Almaty oblysynda ınfraqurylymdyq obektiler salý jobalaryn qarastyryp otyr. Іske asyrý bastalǵan iri jobalardyń qatarynda Almaty JEO-2-ni jańǵyrtý, Almaty oblysynda JEO-3-ti qaıta jańartý, Kókshetaý, Semeı, Óskemen qalalarynda JEO, Qyzylorda oblysynda elektr stantsııasyn salý, Abaı oblysynda GES, Ekibastuz GRES-2-ni keńeıtý jáne qaıta jańartý jáne t. b. bar.
Keńes qorytyndysy boıynsha vıtse-premer Ulttyq ekonomıka mınıstrligine iske asyrylyp jatqan bastamalardyń aýqymyn eskere otyryp, olardy ulǵaıtý jónindegi usynystarmen 2025 jylǵa arnalǵan barlyq úsh kompanııanyń jobalarynan JQQ jáne negizgi kapıtalǵa ınvestıtsııa boıynsha esepterdi daıyndaýdy tapsyrdy. Sondaı-aq kez kelgen ekonomıkalyq syn-qater jaǵdaıynda turaqtylyqtyń negizi retinde ınfraqurylymdyq jobalardy ýaqtyly iske asyrý qajettigin atap ótip, jekelegen kompanııalardy qaraý qorytyndysy boıynsha shtabta «Samuryq-Qazyna» UÁQ-nyń el ekonomıkasyna qosqan úlesi turǵysynan ekonomıkalyq tıimdiligi qaralatynyn atap ótti.
Buǵan deıin habarlanǵandaı, Serik Jumanǵarın bıyl memleket kepildigimen alynatyn qaryz kólemi 1,9 trln teńgege ulǵaıatynyn aıtqan bolatyn.