Ekologııany jaqsartýǵa salǵyrt qaraǵan pavlodarlyq kásiporyndar jazalandy
PAVLODAR. KAZINFORM — Ekologııa kodeksi óndiris oryndarynda monıtorıngtiń avtomattandyrylǵan júıesin engizýdi mindetteıdi. Ókinishke qaraı, Pavlodar oblysynda bul talapty jetkilikti oryndamaı otyrǵan kásiporyndar bar.
Kásiporyndardaǵy óndiristik qaldyqtar men shyǵaryndylardy baqylaýdy kúsheıtý maqsatynda Ekologııa kodeksinde 1-sanattaǵy obektilerge monıtorıngtiń avtomattandyrylǵan júıesin (MAJ) engizý mindetti ekeni kórsetilgen.
Ol — shyǵaryndylar kórsetkishin onlaın rejımde qadaǵalaýǵa jáne kásiporyn tarapynan profılaktıkalyq sıpatta da jedel áreket etýge, sondaı-aq memlekettik baqylaý tarapynan da sharalar qabyldaýǵa múmkindik beretin júıe.
Óńirlik ekologııa departamentiniń dereginshe, Pavlodar oblysy boıynsha MAJ ornatý tizimine 15 kásiporyn enip otyr.
Bulardyń ishinde «Ekibastuz GRES-2 stantsııasy» AQ, «Bogatyr Kómir» JShS, «Maıkýben-Vest» AQ derekteri birden «Qazaqstan Respýblıkasynyń qorshaǵan orta men tabıǵı resýrstardyń jaı-kúıi týraly ulttyq derekter banki» aqparat júıesine beriledi.
Ózgesinde baılanys arnasyn ornatý, montajdaý, baǵdarlamalyq qamtamasyz etý, jabdyqtardy testileý sııaqty jumystar júrgizilip jatyr. Alaıda keıbir óndiris oryndary bul jobaǵa salǵyrt qarap otyrǵany baıqalady.
— MAJ engizý talaptaryn saqtamaǵany úshin departament 6 nysanǵa ákimshilik shara qoldandy. Atap aıtqanda «Pavlodarenergo» AQ-nyń JEO-3 stansasyna — 2 mln teńge somasynda, JEO-2 stansasyna — 1 mln 661 myń teńge aıyppul salyndy. Buǵan qosa «Energy Solutions Center» JShS, «KSP Steel» JShS PF, «Pavlodar-Vodokanal» JShS, «Bolat Nurjanov atyndaǵy Ekibastuz GRES-1» JShS-na zańbuzýshylyqtardy joıý jóninde nusqama berildi. Olar merziminde oryndalmasa, ákimshilik jaýapkershilik belgilenedi. Al MAJ ornatý kásiporyndardyń óz qarajaty esebinen júzege asady, — deıdi Pavlodar oblysy boıynsha ekologııa departamentiniń basshysy Qanat Musaparbekov.
Ótken jyly respýblıka boıynsha atmosferalyq aýaǵa shyǵarylatyn lastaýshy zattardyń kólemi 2,4 mln tonnany qurasa, Pavlodar oblysynda atalǵan kezeńdegi bul kólem 703 970 tonnaǵa jetken.
Saıyp kelgende elimizdegi atmosferalyq aýaǵa shyǵarylatyn lastaýshy zattardyń 30%-y oblysqa tıesili.
Oblys kásiporyndary ruqsat sharttary boıynsha mindettemelerdi oryndaý sheńberinde lastaýshy zattardyń shyǵaryndylaryn azaıtýǵa baǵyttalǵan tabıǵat qorǵaý is-sharalaryn iske asyrýda. Máselen 2023 jyly olardyń kólemin 22,53 myń tonnaǵa azaıtýǵa múmkindik bergen.
Oblys kásiporyndary ekologııalyq ruqsattar sharttary boıynsha mindettemelerdi oryndaý sheńberinde shyǵaryndylardy azaıtýǵa, óndiris qaldyqtaryn ornalastyrýdy qysqartýǵa, sý resýrstaryn utymdy paıdalanýǵa, kógaldandyrýǵa jáne t. b. baǵyttalǵan tabıǵat qorǵaý is-sharalaryn iske asyrýda.
Tabıǵat qorǵaý is-sharalaryn oryndaý 2023 jyly atmosferalyq aýaǵa lastaýshy zattar shyǵaryndylarynyń kólemin 22,53 myń tonnaǵa azaıtýǵa múmkindik berdi.
Tabıǵat qorǵaý is-sharalaryna bólingen qarajattary da jylma-jyl ulǵaıyp, byltyr josparlanǵan 15,5 mlrd teńge qarajattyń ornyna 19,4 mlrd teńge ıgerilgen. Al bıylǵy jyldyń alǵashqy 9 aıynda kásiporyndar 39,9 mlrd teńgeni ekologııany jaqsartýǵa baǵyttaǵan.
Jalpy bıylǵy 11 aıdyń aıdyń qorytyndysy boıynsha departament mamandary 91 kásipkerlik sýbektisinen ekologııalyq zańnama talaptaryn buzý týraly 114 derekti anyqtaǵan. Olarǵa 45 mln teńgeden astam somaǵa 67 ákimshilik aıyppul salyndy.
Eske sala keteıik, Ekibastuz MAES-1 ekologııa departamenti ókilderin baqylaý nysandaryna kirgizbeı qoıǵan edi.