Ekologııa mınıstri jumys saparymen Qaraǵandy oblysyna bardy

QARAǴANDY. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev geologııalyq zertteýler jumysynyń deńgeıi men óńirdiń resýrstyq bazasynyń kórsetkishterimen tanysý úshin Qaraǵandy oblysyna bardy, dep habarlaıdy QazAqparat tilshisi.

Atalmysh vedomostvonyń baspasóz qyzmetiniń habarlaýynsha, ekologııa mınıstri oblys ákimi Jeńis Qasymbekpen birge metallýrgııa, taý-ken, kómir keni, mys óndirisi salalaryndaǵy ónerkásip oryndary basshylarynyń qatysýymen jınalys ótkizdi.

Atap aıtqanda, kezdesýde «ArselorMıttal Temirtaý», «Qazaqmys», «Shubarkól Kómir», «YDD Corporation» kompanııalary ókilderi jáne taǵy basqalar boldy.

Maǵzum Myrzaǵalıevtiń sózinshe, Qaraǵandy oblysy mıneraldyq-shıkizat bazasynyń áleýeti joǵary.

«Bul jerde iri taý-ken óndiristeri bar. Sońǵy 10 jylda óńirdiń jer qoınaýyn paıdalanýǵa tartylǵan ınvestıtsııa kólemi úsh esege ósken. Jer betine jaqyn ken oryndarynyń qory taýsylýǵa jaqyn ekendigin eskere otyryp, Qaraǵandy oblysyndaǵy geologııalyq barlaý jumystaryn jańa tehnologııalardy qoldaný arqyly tereńdete túsý kerek. Jańa ken ornyn tabý men ony qoldanysqa engizýdiń arasy 10-15 jyl bolǵandyqtan bul jumysqa búgin kirisý qajet»,- dedi M. Myrzaǵalıev jıyn barysynda.

Mınıstr sonymen birge óńirdiń ekologııalyq ahýalyn jaqsartýǵa baılanysty sharalardyń mańyzdylyǵyna toqtaldy.

«Oblystaǵy atmosferalyq aýanyń lastaný problemasy óte ózekti. Bul sózsiz iri ónerkásiptiń jumysyna baılanysty. Sondyqtan óndiristi arttyra otyryp, shyǵaryndylardyń kórsetkishine de nazar aýdarý kerek. Mysaly, «YDD Corporation» JShS zaýytynda óndiris tıimdiligi kórsetkishiniń joǵarylyǵy baıqalady. Shyǵaryndylar kólemi az»,- dep atap ótti mınıstr.

Qazir Qaraǵandy oblysynda memleket balansynda 51 mys, 56 altyn, 32 qorǵasyn, 28 tsınk, 36 marganets rýdasy jáne 28 temir ken oryndary bar. Tas kómir jáne qońyr kómirdiń negizgi qory osynda shoǵyrlanǵan. Qaraǵandy kómir basseıni respýblıkadaǵy metallýrgııalyq ónerkásip kásiporyndaryna koks kómirin jetkizedi.

«Memleket basshysy geologııalyq barlaýdyń turaqty damýyn qamtamasyz etýdi jáne mıneraldyq shıkizat bazasyn tolyqtyrýdy tapsyrǵan. Bul úshin geologııalyq barlaýdyń 5 jyldyq memlekettik baǵdarlamasy jasalady. Atalǵan baǵdarlama elimizdiń tabıǵı baılyqtaryn geologııalyq zertteý salasyndaǵy barlyq tapsyrmalardy oryndaýǵa baǵyttalǵan asa mańyzdy qujat bolady»,- dep atap ótti mınıstr.

Talqylaý barysynda mıneraldyq shıkizat bazasy mys, altyn, polımetall jáne marganetsti geologııalyq barlaý jumystarymen tolyǵatyny aıtyldy.