Eki jylda memqyzmetterdiń 90 paıyzy elektrondy formatqa aýysady
Bul týraly búgin Astanada ótip jatqan «Memlekettiń ashyqtyǵy men eseptiligi - jemqorlyqqa qarsy qazirgi saıasattyń negizi» atty suhbat alańynda QR Memlekettik qyzmet isteri jáne sybaılas jemqorlyqqa qarsy is-qımyl agentigi tóraǵasynyń orynbasary Oljas Bektenov málim etti.
«Qazaqstan táýelsizdigin alǵannan bastap aýqymdy reformalardy iske asyrýda. Elimiz sybaılas jemqorlyqqa qarsy is-qımyldyń álemdik standarttarǵa sáıkes keletin tıimdi mehanızmderin qalyptastyrý baǵytyn ustandy. Memleket basshysy Qazaqstan halqyna Joldaýynda ashyqtyq jáne aqparatqa qoljetimdilik máselelerin erekshe atap ótken bolatyn. Qazirgi tańda Qazaqstan sybaılas jemqorlyqqa qarsy is-árekettiń jańa dáýirin bastady», - dedi Oljas Bektenov.
Onyń aıtýynsha, elimizde ashyqtyq pen aıqyndyq qaǵıdattaryna negizdeletin sybaılas jemqorlyqqa qarsy kúrestiń jańa modeli qalyptasqan.
«Jyl basynan beri halyqqa kórsetiletin memlekettik qyzmetterdiń 55 paıyzy onlaın-rejimge kóshirildi. «Bir tereze» qaǵıdaty boıynsha qyzmetterdiń 23 paıyzy kórsetilip jatyr. ıAǵnı, jalpy alǵanda memlekettik qyzmetterdiń 78 paıyzy azamattar men memlekettik qyzmetkerlerdiń baılanysynsyz kórsetilýde. Bul sharalar atalmysh salada turmystyq jemqorlyqtyń deńgeıin 3/4 mólsherge (75 paıyzǵa) deıin azaıtýǵa múmkindik berdi. Bizdiń maqsat - aldaǵy eki jylda memlekettik qyzmetterdiń 90 paıyzyn elektrondy formatqa aýystyrý. Al qalǵan qyzmetterdiń 10 paıyzyn tek «Bir tereze» qaǵıdaty boıynsha kórsetý deńgeıine jetkizgimiz keledi», - deıdi Oljas Bektenov.
Agenttik tóraǵasynyń orynbasary atap ótkendeı, qazirgi tańda memlekettik organ basshylarynyń halyq aldynda jarııaly túrde esep berý tájirıbesi de óz jemisin berip jatyr.
«Elimizde eki júzge tarta qoǵamdyq keńes jumys júrgizýde. Árbir memlekettik organ normatıvti-quqyqtyq qujattardy daıarlaý kezinde ony qoǵamdyq keńestiń talqysyna salyp, barlyq eskertýlerdi esepke alýy kerek. Bıyl bıýdjettiń tórtinshi deńgeıi engizildi. Jergilikti bıýdjet tek jergilikti halyqtyń talqylaýynan ótkennen keıin ǵana bekitiledi. Osynyń nátıjesinde, bıýdjet árbir óńirdiń qajettiligine qaraı jumsalatyn bolady», - deıdi ol.
