Ekibastuzdaǵy alyp muzdyq qaıdan paıda boldy?
PAVLODAR. KAZINFORM - Ekibastuz qalasynyń mańynda tańǵajaıyp alyp muzdyq paıda boldy. Іshinde úńgiri bar muz nysany jaqyn jerdegi sý qubyrynyń jarylýynan túzilgeni anyqtaldy.
Bul muzdyqtyń vıdeosyn jýrnalıst Ashat Nııazov Instagram-daǵy paraqshasynda jarııalady.
«Muzdyq Ekibastuzdaǵy apattan soń paıda bolǵan tárizdi. Bul jerde qanshama sý tógilgenin elestetýdiń ózi qıyn, jaryq qubyrlardan sý áli de aǵyp jatyr. Jýyq ýaqytta ol erı bastaıdy, sondyqtan oǵan jaqyndaý qaýipti bolar. Eger ony kórseńizder, ishine kirmeńizder. Syrtynan qaraǵanda da ádemi», - dep jazdy avtor paraqshasynda.
Oıda joqta elsiz dalada paıda bolǵan «tańǵajaıyp kompozıtsııa» jóninde Ekibastuz qalasy ákimdiginen suraǵan edik. Belgili bolǵandaı, ol aýyzsý qubyry boıyndaǵy jaryqtan aqqan sýdan túzilipti.
«Leshoz aýdany mańyndaǵy bul qubyr «Gorvodokanal» mekemesiniń balansynda tur. Qysta bul jerde iri apat bolyp, aıazdyń saldarynan álgindeı muzdyq túzilgen. Qubyrdaǵy jaryq jamalyp, qalpyna keltirildi. Bıylǵy jyly aýmaqtaǵy magıstraldik sý qubyryn rekonstrýktsııalaý josparlanǵan. Aldaǵy ýaqytta mundaı zalaldar paıda bolsa, birden qalpyna keltiriledi», - dep habarlady Ekibastuz qalalyq ákimdiginiń baspasóz qyzmetinen.
Atalǵan ýchaskeni jóndeıtin merdiger qazirden tańdalyp qoıǵan, kún jylynǵanda iske kirisedi.
Shahar turǵyndary men muzdyqty kórgen adamdar álgi jerde kóp mólsherde sý tógilgeni anyq dep otyr. Olar sýdyń únemsiz jaǵdaıda dalaǵa aǵyp ketken shyǵynyn tutynýshylardan óndirip almaı ma dep te kúdiktenip otyrǵanyn jasyrmady. Al, sýmen qamtý mekemesi aldaǵy ýaqytta tarıfte eshqandaı ózgeris bolmaıdy dep sendirgen.
Aıta keteıik, 2022 jyldyń qarasha aıynda qalanyń jylý júıesinde keshendi apat bolǵanda mundaı muzdyqtar qalanyń ár jerinde paıda bolǵan edi.
