Ekibastuzda jasyryn alkogol óndirgen tseh anyqtaldy

ASTANA. KAZINFORM — «Quqyqtyq tártip» jedel-profılaktıkalyq is-sharasy barysynda polıtsııa qyzmetkerleri Ekibastuz qalasynda turǵyn úılerdiń birinde zańsyz túrde alkogol óndirýmen aınalysqan jasyryn tsehtyń jumysyn toqtatty. 

Tekserý barysynda turǵynnyń óz úıinde qoldan jasalǵan jabdyqtar arqyly alkogol ónimderin daıyndaǵany anyqtaldy.

— Úı-jaıdy tekserý kezinde ishinde belgisiz suıyqtyq bar 139 plastık bótelke, syraǵa uqsas 288 lıtr suıyqtyq, 10 shyny kolba, sondaı-aq vıskı, lıker jáne syra sekildi alkogol ónimderin qoldan jasap shyǵarýǵa arnalǵan apparat pen spırt óndirýge arnalǵan qural-jabdyqtar anyqtalyp, tárkilendi.

Ónimderge belgili brendterdiń etıketkalary japsyrylǵanymen, aktsızdik belgileri bolmaǵan. Tárkilengen ónimder saraptamaǵa jiberildi. Onyń nátıjeleri boıynsha tıisti protsessýaldyq sheshim qabyldanady, — dedi Pavlodar oblysy Ekibastuz qalalyq polıtsııa basqarmasynyń bastyǵy Tólegen Qudaıbergenov.

Polıtsııa alkogol ónimderin zańsyz óndirý, sondaı-aq ony daıyndaýǵa arnalǵan qural-jabdyqtardy saqtaý qoldanystaǵy zańnamaǵa sáıkes jaýapkershilikke ákep soǵatynyn eskertedi.

Aıta ketelik Іshki ister mınıstrligi alkogoldi tek arnaıy alkomarketterde satýdy usynǵan edi.