Ekibastuzda bir adamdy óltirip, ekinshisine pyshaq jaraqatyn salǵan áıel ustaldy

PAVLODAR. KAZINFORM — Aldyn ala málimet boıynsha Ekibastuz qalasynyń turǵyny er adamdy óltirip, áıeldi pyshaqtap ketken.

Telegram arnasynda kúdiktiniń qurbandardyń birine tap bergen beınekadrlar tarady. Oqıǵa kópqabatty turǵyn úıdiń kireberisinde bolǵan. Vıdeodan qansyraǵan áıeldiń baspaldaqpen túsip bara jatqanyn kórýge bolady. Kúdikti jábirlenýshiniń artynan kelip, onyń denesine soqqy bere bastaıdy. Pavlodar oblysynyń polıtsııa departamenti osy oqıǵa boıynsha túsinikteme berdi. Qylmys 9 qańtar kúni Ekibastuz qalasynda bolǵan.

— Oqıǵa ornyna kelgen polıtsııa qyzmetkerleri turmystyq janjal barysynda mas kúıde bolǵan janjalǵa qatysýshylardyń birine birneshe pyshaq jaraqaty salynǵanyn anyqtady. Alǵan jaraqattarynyń saldarynan ol oqıǵa ornynda kóz jumdy. Sonymen qatar taǵy bir áıel pyshaq jaraqatyn alyp, medıtsınalyq mekemege jetkizildi, — dep jazdy oblystyq polıtsııa departamenti.

Qazir kúdikti qolǵa tústi, ol ýaqytsha ustaý ızolıatoryna qamaldy. Adam óltirý jáne kisi óltirýge oqtalý baptary boıynsha qylmystyq is qozǵaldy. Qazirgi ýaqytta tergeý amaldary júrgizilip jatyr.

Zardap shekken adam qazirgi ýaqytta aýrýhananyń travmatologııa bólimshesine jatqyzylǵan. Densaýlyǵynda oń dınamıka baıqalady.

— 9 qańtar kúni zardap shegýshi Ekibastuz qalalyq aýrýhanasyna jambas aımaǵynda kesilgen jaraqattarmen túsip, jedel túrde reanımatsııa bólimine jatqyzylǵan. Áıelge medıtsınalyq kómek tolyq kólemde kórsetildi. Naýqastyń jaǵdaıy turaqty, oń dınamıkasy bar. Ol aqyl-esin joǵaltpaǵan, ózdiginen tynys alady. Buǵan deıin joǵaltqan qany tolyqtyryldy. Zertteý nátıjeleri boıynsha qosymsha patologııa anyqtalǵan joq. Naýqas odan ári emdeý úshin travmatologııa bólimine aýystyryldy, — dep habarlady óńirlik densaýlyq saqtaý basqarmasynan.

Buǵan deıin Atyraý oblysynda Jangeldi aýylynyń turǵyndaryn óltirý deregi boıynsha kúdiktige izdeý jarııalanǵany týraly jazdyq.