Ekibastuz JEO Samuryq-Energoǵa berildi
PAVLODAR. KAZINFORM - Ekibastuz qalasynyń ákimdigi Ekibastuz JEO-ny «Samuryq-Energoǵa» senimgerlik basqarýǵa berdi. Aktsıonerlik qoǵamdyq stansany «Energy Solution Center» JShS enshiles kompanııasy arqyly basqarady.
Ekibastuz jylý-energııa ortalyǵy «Samuryq-Energo» AQ-ǵa senimgerlik basqarýǵa berildi. Bul týraly kompanııanyń baspasóz qyzmetinen habarlady.
«Samuryq-Energo» AQ Basqarma tóraǵasy Qaırat Maqsutov Ekibastuz JEO-da jınalys ótkizip, «Energy Solution Center» JShS Bas dırektory Aıdarbek Qystaýbaevty, sondaı-aq onyń óndiris, qarjy jáne qamtamasyz etý jónindegi orynbasarlaryn tanystyrdy. Sonymen qatar Samuryq-Energo basshysy bıyl Ekibastuz JEO-da energetıkalyq qazandyqtar men qosalqy jabdyqtardyń bir bóligin jóndeý josparlanyp otyrǵanyn atap ótti», - dep málimdedi kompanııadan.
Kezdesý qorytyndysy boıynsha Q.Maqsutov stansa basshylyǵyna aldaǵy jylytý maýsymyna sapaly daıyndyq pen jóndeý naýqanyn ótkizý boıynsha birqatar tapsyrmalar berdi.
Ekibastuz JEO 1956 jyly paıdalanýǵa berilgen. Stansada belgilengen elektr qýaty - 12 MVt, jylý qýaty — 750 Gkal/saǵ. Jylý elektr ortalyǵy Ekibastuz qalasyn jylýmen tolyq qamtamasyz etedi.
Eske sala keteıik, 2022 jyldyń sońynda Ekibastuz JEO-da júıeli apat bolyp, qaladaǵy úılerdiń kóp bóligi qaqaǵan aıazda jylýsyz qalǵan edi.
Bıyl QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi.
