Ekibastuz GRES úshinshi energoblogy 2028 jyly iske qosylady
ASTANA. KAZINFORM — Ekibastuz GRES № 3 jáne № 4 energobloktardyń iske qosylýy qýat tapshylyǵyn jaýyp qana qoımaı, derekterdi óńdeý ortalyǵyn, protsessordy salqyndatý júıelerin damytýǵa múmkindik beredi. «Samuryq-Energo» AQ basqarma tóraǵasy Qaırat Maqsutov kómir óndirýdiń jańa qýattaryn engizý boıynsha ınvestıtsııalyq jobalardy iske asyrý jaıynda aıtyp berdi.
Qazirgi ýaqytta «Samuryq-Energo» AQ kómir stantsııalaryn salý boıynsha tórt jobany iske asyrýda. Atap aıtqanda, Ekibastuz GRES úshinshi jáne tórtinshi bloktaryn salý arqyly keńeıtý jáne rekonstrýktsııalaý, sonymen birge Kókshetaý, Semeı, Óskemen qalalaryndaǵy jylý elektr ortalyqtaryn salý kózdelgen.
— GRES-tiń árqaısysynyń qýaty 550 megavatt bolatyn 3,4 energobloktaryn salý jobasy iske asyrylýda. 2025 jylǵy mamyrda qazaqstandyq konsortsıýmmen EPC kelisimshart jasaldy. Merdigermen tıisti jumys kestesi bekitildi. Qazirgi ýaqytta eki energobloktyń jobalaý-smetalyq qujattamasyn ázirleý aıaqtaldy, — dedi Qaırat Maqsutov Úkimettiń búgingi otyrysynda.
Bekitilgen kestege sáıkes, úshinshi energoblok 2028 jyldyń qyrkúıeginde iske qosylady. Qazirgi ýaqytta onda qurylys jumystary júrip jatyr. Injenerlik kommýnıkatsııalardy tartý, jabdyqtardy qabyldaý qoımalary, angarlar salý sharalary aıaqtaldy. Sondaı-aq, irgetas jumystary úshin beton daıyndaý kesheni iske qosyldy.
— Bas ǵımarat boıynsha, bıyl mashına zalynyń karkasyn turǵyzý, shatyryn jabý jáne irgetasyn quıý jumystaryn aıaqtaýdy josparlap otyrmyz. Sonymen birge, bıyl biz qazandyqty da jınaýǵa kirisemiz. Negizgi jabdyqtar bıylǵy jyldyń úshinshi toqsanynan bastap keledi, — dep atap ótti spıker.
Tórtinshi energoblok jobasyn iske asyrý aıasynda Energetıka mınıstrligimen ınvestıtsııalyq kelisimge qol qoıý jumystary atqarylyp jatyr. Osyǵan baılanysty energetıka mınıstrligi qajetti lımıtti ulǵaıtýdy aıaqtady. Sáýir aıynda ınvestıtsııalyq kelisimge qol qoıylady dep kútilýde.
— Investıtsııalyq kelisim shyqqan soń EPC-merdigerge avans tólenedi. Sonyń nátıjesinde 2027 jyldyń ekinshi toqsanynda tórtinshi energobloktyń negizgi jabdyqtary — týrbına, generator, qazandyqty jetkizý bastalady. Tórtinshi energoblok 2030 jyldyń qyrkúıeginde paıdalanýǵa beriledi. № 3 jáne № 4 energobloktardyń iske qosylýy tek qýat tapshylyǵyn jaýyp qana qoımaı, qazirgi tańda ózekti máselege aınalǵan derekterdi óńdeý ortalyǵyn, protsessordy salqyndatý júıelerin damytýǵa múmkindik beredi, — dedi Qaırat Maqsutov.
Buǵan deıin Energetıka mınıstri Erlan Aqkenjenov «Kómir generatsııasyn damytý» jobasynan kútiletin nátıjelerdi atady.