Eki myńnan astam azamatqa arnaýly áleýmettik qyzmet tsıfrlyq júıe arqyly qoljetimdi bolmaq
ASTANA. KAZINFORM – Qaraǵandy oblysynda 2,2 myńnan astam azamat arnaýly áleýmettik qyzmetke tsıfrlyq júıe arqyly júginýge múmkindik aldy. Bul týraly QR Eńbek jáne halyqty áleýmettik qorǵaý mınıstrligi habarlady.
Qaraǵandy oblysynda arnaýly áleýmettik qyzmetterdiń tıimdiligi men ashyqtyǵyn arttyrý maqsatynda pılottyq rejımde 10 statsıonarlyq úlgidegi arnaýly qyzmetter kórsetý ortalyqtarynyń bazasynda jumys protsesterin tsıfrlandyrý júrgizilip jatyr. Joba aıasynda 2 258 arnaýly qyzmet alýshynyń medıtsınalyq kartalary tsıfrlandyrylyp, birqatar jumys júıesi avtomattandyryldy.
QR Eńbek jáne halyqty áleýmettik qorǵaý mınıstrligi, QR Densaýlyq saqtaý mınıstrligi men Qaraǵandy oblysynyń ákimdigi arasynda Arnaýly áleýmettik qyzmetter kórsetý ortalyqtarynyń qyzmetin transformatsııalaý boıynsha yntymaqtastyq týraly memorandým jasaldy.
Búgingi tańda óńirdiń 10 ortalyǵynan 358 qyzmetker «Sotsıým» aqparattyq júıesine qosylǵan. Onda elektrondyq formatta 2 258 arnaýly áleýmettik qyzmet alýshylardy tirkeýden jáne alǵashqy tekserýden bastap kórsetilgen qyzmetter men alynǵan dári-dármekterge deıin júrgizý júzege asyrylady.
«Pılottyq joba arnaýly áleýmettik qyzmetter kórsetý júıesinde táýekelderdi dálirek basqarýǵa arnalǵan quraldardy usynady. Tsıfrlandyrý kórsetiletin qyzmetterdiń sapasyn jáne alýshylardyń qanaǵattaný deńgeıin arttyrýǵa yqpal etedi. Bul jobanyń basty jetistikteriniń biri ataýlylyqty qamtamasyz etý bolady», – dedi QR Eńbek mınistiriligi Áleýmettik qyzmetter departamentiniń dırektory Syrym Násı.
Ortalyqtardyń qyzmetin tsıfrlandyrý áleýmettik qyzmetter kórsetý salasyndaǵy barlyq rásimderdiń, standarttar men talaptardyń oryndalýyn avtomatty túrde baqylaýǵa jáne qujattaýǵa múmkindik beredi. Bul ulttyq zańnamany qatań saqtaýǵa, sondaı-aq bıýdjet qarajatyn jumsaýdyń ashyqtyǵy men tıimdiligin arttyrýǵa yqpal etedi dep kútiledi.
Vedomstvonyń málimetinshe, qazirgi tańda oblys deńgeıinde jumys protsesin, materıaldyq-tehnıkalyq resýrstarmen qamtamasyz etilýin, tósek-oryndardyń tolymdylyǵyn, kadrlarmen qamtamasyz etilýin jáne olardyń biliktilik deńgeıin, vedomstvolyq baǵynysty mekemelerdiń shyǵyndaryn monıtorıngteýge tolyq múmkindik bar.
Osy baǵytta atqarylǵan jumystyń nátıjesi boıynsha:
- qujattamany toltyrý ýaqyty qysqartylǵan;
- barlyq qujattama elektrondyq formatqa aýystyryldy;
- dárilik zattardyń derbestendirilgen esebi jáne ońaltýdyń jeke baǵdarlamasynyń oryndalýyn baqylaý qamtamasyz etildi;
- alǵashqy medıtsınalyq-sanıtarlyq kómekke jáne oblys statsıonarlaryna elektrondyq taǵaıyndaý júzege asyrylyp jatyr.
Jalpy, bul joba ortalyqtardyń jumysyn jaqsartyp qana qoımaı, arnaýly áleýmettik qyzmetter kórsetý júıesin qoljetimdi etedi, ony kómekke muqtaj adamdardyń keń aýqymyna boljaýǵa múmkindik beredi.
