Eki kúnniń birinde volonterlik qyzmette júremin - aqtóbelik belsendi
Aqtóbeniń Hromtaý aýdanyndaǵy ken ornynda jumys istep, volonterlik salany qatar alyp júrgen Farhad Saǵynbaı búginde aýdandyq máslıhat depýtaty. 12 saǵat boıy ken baıytý kombınatynda eńbek etip, eki táýlik demalatyn jas jigit sol eki kúniniń birinde erikti bolyp, sharalar uıymdastyrady. Farhad Saǵynbaı Kazinform-ǵa suhbat berip, eriktilerdiń búginin baıandady.
— Adamdarǵa járdemdesý, qıyn kezde qolushyn sozý bizdiń bolmysymyzda bar qasıet. Qazir osy qasıet boıǵa daryǵan jastar birigip, zor kúshke aınaldy. Ózińiz eriktilerdiń qataryna qashan qosyldyńyz?
— Men 2014 bastap Hromtaý aýdanynda volonter boldym. Ol kezde aýdandyq jastar resýrstyq ortalyǵy ashylyp, «Hromtaý jastary» toby quryldy. Erekshe oqıǵa esimde qalǵan. Balalar úıine barǵan kezde bir sábı qolymnan ustap: «Aǵa, siz taǵy kelesiz be?» — dep surady. Ýáde berdim. Keıin kontsert uıymdastyryp, qarjy jınap, qaıta oraldym. Sodan jumys toqtamady.
Ol kezde Hromtaý aýdanynda da patronat otbasy boldy. Biz baryp, túrli mádenı-sporttyq shara, qaıyrymdylyq aktsııasyn ótkizdik. Sonymen birge, Aqtóbe oblysy Mártók aýdanyndaǵy Jaısań arnaıy mektep-ınternatyn esten shyǵarmadyq. Qaıyrymdylyq kontsertten túsken qarjyǵa balalarǵa qajetti qural-jabdyq satyp alýǵa kómektestik.
Al 2018 jyly «Qaharman» qoǵamdyq birlestigi jumysyn bastady. Bul jumystyń báriniń basy-qasynda jastar júr. Qazir Volonterler keńesiniń tóraǵasy Nurbek Jalǵasbaevtyń emine qarjy jınap jatyrmyz. Onyń eki búıregi birden syr berip, otaǵa daıyndalyp júr. Bar kúshti salyp, mıllıondar aýdarýǵa kómektesip jatyrmyz.
Ózim mektep, kolledj kezinen belsendi boldym. Hromtaý taý-tehnıkalyq kolledjinde oqyp júrgende tam-tumdap jınalyp, qatarǵa qosylǵandar qatary artty. Keler jyly erikti bolyp júrgenime on jyl tolady eken.
— Erikti dep qolbalasyndaı jumsaıtyndar bola ma?
— Buryn eriktiler qonaqtardy kútip alatyn, qolyna jalaýsha ustap turatyn adamdar boldy. Qazir kózqaras ózgerdi. Volonterdiń baǵyt-baǵdary bar, tipti qoǵam belsendisi atanyp júr.
— Áý basta sizderdi kim biriktirdi?
— Topty ashatyn kezde Kákim Sataev boldy. Sonymen birge Nazgúl Sársenbaıqyzyn da aıta ketý kerek. Sol jyldary bastalǵan jumys áli jalǵasa beredi.
Jastarmen kezdesken kezde: «Volonterge aqsha tóleı me?» — dep surap jatady. Ondaıda eriktiniń eńbegi týraly jan-jaqty aqparat beremin. Qoǵamdyq jumysty adam ózinen bastaýy kerek ekenin túsindiremin. Jasy úlkenge qurmet kórsetip, óz qurdastaryńmen syrlasasyń, kishige qamqor bolasyń. Sóıtip dúnıetanymyń, kókjıegiń keńeıedi, kózqarasyń, adamı bolmysyń qalyptasady. Men de qarapaıym adammyn. Dóń ken baıytý kombınatynda jumys isteımin. Onda tehnologpin. Qazir Hromtaý aýdandyq máslıhatynyń depýtaty boldym. Depýtat bolý arqyly halyqtyń problemasyn kóterýge múmkindik aldym.
— Óndiris ornynda ózińiz sııaqty eriktiler qatarynda júrgen jastar bar ma?
— Onda Jastar keńesi bar. Sonymen birge, aýdandyq jastar resýrstyq ortalyǵy jastar jınalatyn orynǵa aınaldy. Bıyl kovorkıng ortalyǵy ashylyp, úlken maqsatqa qol jetkizdik. Munda til úıretip, bos ýaqytty tıimdi ótkizýge bolady. Volonterler de osynda basqosady, talqylap, oı-bólisedi.
— Volonterlik baǵyttyń túri kóp. Aýdan-aýylda qaı tusyn damytý mańyzdy dep oılaısyz?
— Men jastardyń janyndamyn, sol ortadamyn. Sondyqtan osy baǵytty damyta túsken abzal. Elimizde jastar saıasaty alǵa jyljyp keledi. Áli de túrlendirý kerek. Bilim, mádenıet, sport salasyndaǵy kóp jumysty jetildirgen durys. Sonymen birge, «Qyzyl Aı» alǵashqy kómekti úıretedi. Taıaýda tótenshe jaǵdaıǵa daıyndaý kýrsy ótti. Oǵan aýdannan eki adam jiberildi. Jumys istep júrgen eriktilerdi surap alyp, biliktiligin arttyrýǵa múmkindik bar. Túngi reıdke de shyǵyp, polıtsııanyń qoǵamdyq kómekshisi bolamyz. Keıde áleýmettik jaǵdaıy tómen otbasylarǵa járdem beremiz. Ol kezde demeýshiler kómektesedi.
— Sizderge kim demeýshi bolady?
— Aýdandaǵy kásipkerler eriktilerdiń ótinishin jerde qaldyrmaıdy. Naqty adamdy aıtyp, onyń jaǵdaıyn túsindiremiz. Sol kezde senip, kómektesip jatady. Azyq-túlik, dári-dármek alyp beredi. Balalarǵa merekelik shara da uıymdastyryp, kóńilin kóteretin kez az emes. Qazir bizdiń janymyzda 15-ke jýyq jas bar. Aýdandyq jastar resýrstyq ortalyǵymen qatar júrip, kóp is tyndyrdy.
— Urpaqtar sabaqtastyǵy bar ma? Sizdiń izińizden kim erip keledi?
— Eriktiler qatary únemi jańaryp otyrady. Biri ózge oblys, qalaǵa oqýǵa ketse, biri endi janymyzdan tabyldy. Joǵary synyp oqýshylarynan bastap kelip, keıde orny oısyrap qalady. Sol shaqta kolledjge baryp, kezdesip, ózimizdiń qatarymyzǵa shaqyramyz. Sonymen birge, aýyl jastarymen kezdesip, volonter bolýdyń qyr-syryn úıretemiz. Biraq odan oń nátıje kórmedim. Aýyl jastary selsoq qarady. Mundaı túsindirý jumystary keler jyly da jalǵasady.
— Eriktilerdi qandaı suraqtar mazalaıdy?
— Keıde biz túsinbeıtin jaǵdaı kezdesip jatady. Máselen, «Biz birgemiz» aktsııasy aıasynda azyq-túlik aparý úshin jergilikti áleýmettik sala mamandarynan tizim alamyz. Mekenjaıyn izdep taýyp barǵan kezde ál-aýqaty jaqsy otbasy kezdesip jatady. Tipti, kásipkerdiń de úıine baryp qaldyq. Sondyqtan bizge tizimdi qaıta qarap, irikteý kerek. Monıtorıng jasaý da oıda bar.
— Volonterlik jol adamdy tárbıeleı ala ma?
— Jaqsy iz qaldyrǵyń kelse, qoǵamdyq ispen, volonterlik qyzmetpen aınalysqan durys dep esepteımin. Jaqsylyq jasasań, ózińe de jaqsy. Keıbir zamandasymyz tentekteý bolyp júrip, múmkindigi shekteýli balalardy kórgende, olarǵa qamqorlyq tanytyp, kómekteskende ózgerip sala beredi. «Bir aptadan keıin qaıta keleıik, taǵy da kómekteseıik» dep aıtyp jatady. Ózim de qýanamyn. Men 12 saǵat jumys istep, 2 kún demalamyn. Sol eki kúnniń birin, keıde ekeýin de volonterlik qyzmetke arnaımyn.
— Іsińizge sáttilik tileımiz, suhbatyńyzǵa rahmet.
