Eki adamdy óltirgen kókshetaýlyq ómir boıyna bas bostandyǵynan aıyryldy

KÓKShETAÝ. KAZINFORM - Eki adamdy pyshaqtap óltirgen Kókshetaý qalasynyń turǵyny ómir boıyna bas bostandyǵynan aıyryldy.

Aqmola oblysy PD baspasóz qyzmetiniń málimetinshe, jantúrshigerlik qylmys 2023 jyly Kókshetaý qalasynda bolǵan. Qylmystyq is materıaldarynda kórsetilgendeı, sottalýshy men egde jastaǵy er adam jáne áıel úsheýi qosylyp araq ishedi. Keıin eki er adamnyń arasynda janjal týyndap, sońy tóbeleske ulasady. Ol kezde áıel kórshi bólmede uıyqtap jatady. Tóbeles barysynda sottalýshy qarsylasyna birneshe ret pyshaq suǵyp alady. Ol alǵan pyshaq jaraqatynan sol jerde kóz jumady. Osy kezde, qatty daýystan áıel oıanady. Onyń aıǵaıyn kórshileri estip qalady degen qaýippen er adam ony da pyshaqtap óltiredi.

Osylaısha, áp-sátte eki adamnyń ómirin qıǵan ol páterden shyǵyp, jaqyn mańdaǵy úıdiń aýlasyna pyshaqty laqtyryp ketedi. Artynsha, tergeý organdarynan qutyla almaıtynyn túsingen ol polıtsııaǵa qońyraý shalyp, bolǵan oqıǵany aıtady.

Tergeý barysynda birqatar qajetti tergeý áreketteri, saraptamalar júrgizildi, oqıǵa ornynda kúdiktiniń aıǵaqtary tekserildi.

«Aqmola oblysynyń qylmystyq ister jónindegi mamandandyrylǵan aýdanaralyq sotynyń úkimimen sottalýshy eki adamdy óltirgeni úshin kináli dep tanylyp, ómir boıyna bas bostandyǵynan aıyrý túrindegi jaza taǵaıyndaldy. Ol jazasyn tótenshe qaýipsizdik qylmystyq–atqarý júıesi mekemesinde óteıtin bolady. Sot jazany taǵaıyndaý kezinde sottalýshynyń mas kúıinde aýyr qylmys jasaǵanyn eskerdi. Sonymen birge, ol 2008 jyly kisi óltirip, 9 jylǵa bas bostandyǵynan aıyrylǵan», - dedi vedomstvodan.

Aıta ketsek, budan buryn adam óltirgen qylmysker 25 jyldan keıin ustalǵanyn jazǵan edik.