Egin jınaý úshin 426 myń tonna dızel jeńildikpen beriledi
QR Aýyl sharýashylyǵy mınıstri Aıdarbek Saparov qolaısyz aýa-raıynan zardap shekken fermerlerge qandaı kómek kórsetiletinin túsindirdi, dep habarlaıdy Kazinform agenttigi.
«Egin jınaý jumystaryn ýaqtyly júrgizý úshin aýyl sharýashylyǵy quralymdaryna lıtrine 250 teńge baǵamen 426 myń tonna jeńildikti dızel otyny bólindi. Sonymen birge, qazirgi jaǵdaıdy eskere otyryp, dándi jáne maıly daqyldardy keptirýge lıtrine 250 teńgeden aspaıtyn baǵamen qosymsha 62,5 myń tonna jeńildikti dızel otynyn bólý sheshimi qabyldandy», - dedi A. Saparov Úkimet otyrysynda.
Qazirgi ýaqytta oblystardyń operatorlary astyq qabyldaý kásiporyndaryna jáne keptirý jabdyǵy bar aýyl sharýashylyǵy taýaryn óndirýshilerge dızel otynyn jetkizý jáne ótkizý sharalaryn júrgizýde.
«Úkimet zańnamada belgilengen tártippen sýbsıdııalarǵa qajettilikti tolyq jabý máselelerin pysyqtaýda, sondaı-aq zardap shekken fermerlerdiń qarjy ınstıtýttarynyń jelisi boıynsha alynǵan kredıtteriniń óteý merzimderin uzartýda. Bastapqy kezeńde 30 mlrd teńge mólsherinde sýbsıdııalar boıynsha bereshek óteledi, Úkimettiń tıisti qaýlysy qabyldandy, al qalǵan qaryzdar jyl sońyna deıin jabylady», - dedi A. Saparov.
Kredıt merzimderin uzartýǵa qatysty «Agrarlyq nesıe korporatsııasy» AQ jáne «QazAgroQarjy» AQ jelisi boıynsha qazir 7,2 mlrd teńge somasyna 147 aýyl sharýashylyǵy taýaryn óndirýshiden mindettemelerdi oryndaýdy uzartýǵa ótinishter túsken.
«Qolaısyz aýa-raıynan zardap shekken basqa qaryz alýshylar tarapynan sharttar, usynylatyn qujattar tizbesi jáne mindettemelerdi qaıta qurylymdaý boıynsha ótinishter áli de kelip jatyr. «Agrarlyq nesıe korporatsııasy» AQ jáne «QazAgroQarjy» AQ fılıaldarynyń qyzmetkerleri osy máseleler boıynsha qajetti konsýltatsııalardy kórsetedi, mindettemelerdi jeke tártippen uzartýǵa ótinimder qabyldaıdy jáne qaraıdy», - dedi mınıstr.
Sondaı-aq, «Azyq-túlik korporatsııasy» ulttyq kompanııasy» AQ 350 myń tonna bıdaıdy tikeleı satyp alýǵa qarajat bólý boıynsha jumys júrgizilýde, naryq deńgeıinde astyq satyp alýdyń ádil baǵasy belgilengen.
Buǵan deıin Aýyl sharýashylyǵy mınıstri bıylǵy jyl fermerler úshin ońaı bolmaǵanyn, negizgi astyq egetin óńirlerde nóser jańbyr 25 kúnnen asqanyn aıtqan edi.
Sondaı-aq, Aıdarbek Saparov bıylǵy egin naýqanyn qorytyndylap, qandaı daqyldar men kókónister jınalǵanyn aıtyp berdi.