Eger muǵalimniń shamy sónip qalsa, qoǵam qarańǵylyqta qalady — Aımaǵambetov

ASTANA. KAZINFORM — Májilis depýtaty Ashat Aımaǵambetov sońǵy bilim salasyndaǵy ońtaıly ózgerister Memleket basshysy Qasym-Jomart Toqaev júrgizgen júıeli reformalardyń nátıjesi ekenin aıtty.

Егер мұғалімнің шамы сөніп қалса, қоғам қараңғылықта қалады — Аймағамбетов
Фото: Мәжілістің баспасөз қызметі

 — Alty jyl buryn eger bireý muǵalimderdiń jalaqysy eki ese ósedi, bastaýysh synyp oqýshylaryna tegin ystyq tamaq beriledi, Ulttyq qordyń qarajaty ár balaǵa aýdarylady dese kópshilik senbes edi. Biraq búginde bul — qalypty jaǵdaı, bárine túsinikti ereje, — dedi Aımaǵambetov.

Ol bul bastamalardyń qalaı bastalǵanyn, qandaı kedergiler bolǵanyn jaqsy biletinin jetkizdi.

— Eshkim joqqa shyǵara almaıtyn fakt — bul ózgerister Memleket basshysy Qasym-Jomart Toqaev júrgizgen júıeli reformalardyń nátıjesi. Bilim — bul jaryq. Eger muǵalimniń shamy sónip qalsa, qoǵam qarańǵylyqta qalady. Sondyqtan da Prezıdent reformalaryn dál osy ustazdardan bastady. Muǵalimderdiń ortasha jalaqysy eki ese ósti. «Pedagog mártebesi týraly» zań qabyldandy — endi muǵalimder zań boıynsha gazet-jýrnaldarǵa kúshtep jazylmaıdy, kóshelerdi tazalamaıdy. Eger buryn pedagogıkalyq mamandyqtarǵa talapkerler amalsyzdan túsetin bolsa, qazir ol eń suranysqa ıe mamandyqtyń qataryna kirdi, — dedi ol.

Aımaǵambetov endi muǵalimdikke eń úzdik túlekter keletinin aıtty.

— Pedagogıkaǵa túsýshilerdiń ortasha baly 55-ten 100-ge deıin ósti. Endi muǵalimdikke eń úzdik túlekter keledi. Bul — naǵyz jeńis. Mektep jaı ǵımarat emes — ol bolashaq fabrıkasy. Buryn jańa standarttaǵy, jaıly mektepter tek oblys ortalyqtarynda, mamandandyrylǵan mekeme retinde salynatyn. Búginde «Jaıly mektep» jobasynyń arqasynda eń zamanaýı mektepter shalǵaı aýyldarda da salynyp jatyr. Barlyq mektep birdeı standartpen salynady — zamanaýı jabdyqtar, qaýipsiz orta, erekshe balalarǵa qoljetimdilik. 217 mektep salynady, — dedi Ashat Aımaǵambetov.

Ashat Aımaǵambetov memleket balalardy qoldaýdy kúsheıtkenin atap ótti.

— 100 myńnan astam az qamtylǵan otbasydan shyqqan balaǵa balabaqshadaǵy tamaq úshin tólem jasaýdyń qajeti joq — memleket bul shyǵyndy óz moınyna aldy. Halyqaralyq olımpıadalar men shyǵarmashylyq konkýrstardyń jeńimpazdaryna qarjylaı qoldaý engizildi — 6 mln teńgege deıingi syıaqy jáne JOO-ǵa ENT tapsyrmaı-aq grant ıegeri atanady. Daryndy balalarǵa «Bolashaq» baǵdarlamasymen shetelde oqý múmkindigi berildi, — dedi ol.

Ol búginde memleket erekshe qajettilikteri bar balalarǵa basym nazar aýdarylyp otyrǵanyn jetkizdi.

— Ondaǵan jańa korrektsııalyq kabınetter ashyldy. PMPK men ońaltý ortalyqtarynyń sany artty. Arnaıy baǵdarlamalar men jańa qoldaý sharalary iske qosyldy. Densaýlyq saqtaý: ómir súrýge múmkindik. Onkologııalyq aýrýlarmen aýyratyn naýqastarǵa arnalǵan qymbat targettik dárilerdiń tizimi keńeıtildi. Buryn bul dárilerge qoljetimdilik shekteýli bolsa, endi olardyń tizimi 2 ese, al olardy ala alatyn patsıentter sany 3 ese artty. Bul jaı ǵana sandar emes. Bul — naýqastardyń jaqyndarymen ótkizetin qosymsha ýaqyty. Bul — aman qalǵan myńdaǵan ómir, — dedi Aımaǵambetov.

Ol áli de sheshilmegen máseleler bar ekenin atap ótti. 

— Biraq bir nárse anyq — ózgerister joly qaıtarymsyz. MÁMS máseleleri — medıtsınalyq kómektiń sapasy men qoljetimdiligi, uzaq kútý merzimi jáne tekserýden ótý júıesindegi problemalar. Júzmyńdaǵan azamattyq qyzmetkerdiń tómen jalaqysy men múgedektigi bar azamattardyń qazirgi baǵalarǵa saı kelmeıtin járdemaqysy — bul máselelerdi bolashaqta qaıta qarastyrý qajet. Urpaq tárbıesi men ulttyq qundylyqtardy damytý.  Atqarylǵan, reformalardyń barlyǵy — El Prezıdentiniń jańa, zamanaýı saıasattynyń aıqyn kórinisi. Bastysy, búgingi tańda tek problemalardy sheshý ǵana emes, áleýmettik saıasattyń tutas qaǵıdasy ózgerip jatyr, — dedi depýtat.

Aıta ketelik Ashat Aımaǵambetov baǵalarǵa saı kelmeıtin járdemaqy máselesin sheshý qajet ekenin aıtqan edi

Сейчас читают