EEK krıptovalıýta engizý máselesin qarastyrmaq

SOChI. QazAqparat - Eýrazııalyq ekonomıkalyq komıssııa krıptovalıýta engizý jáne olardy retteý máselelerin qarastyratyn bolady. Bul jaıynda EEK-tiń ıntegratsııa jáne makroekonomıka jónindegi alqasynyń múshesi (mınıstri) Tatıana Valovaıa aıtty, dep habarlaıdy QazAqparat tilshisi.

Onyń atap ótýinshe, komıssııa odaq aldynda turǵan syn-tegeýirinderge der ýaqytynda jaýap berý, jańa tendentsııalardy ilip alý úshin álemdik ekonomıkada oryn alyp jatqan jaıttardy qadaǵalap otyrady. Osy rette Tatıana Valovaıa mundaı tendentsııalardyń biri tsıfrlyq ekonomıka ekendigin basa aıtty.

«Ózderińiz de biletindeı, bizdiń prezıdentterimiz ótken jyly tsıfrlyq kúntártip týraly arnaıy deklaratsııa qabyldaǵan bolatyn. Qazirgi ýaqytta biz bul máselemen óte belsendi jumys istep jatyrmyz (...). Tsıfrlyq kúntártip júıeli másele. EEK-tiń barlyq bloktary bul taqyryppen jumys iste jatyr. Máselen, mende makroekonomıkalyq blok. Biz krıptovalıýtamen, olardy retteýmen baılanysty máselelerdi, blokcheın problematıkasyn belsendi zerdeleýdemiz. Bul máselege qatysty birqatar sharalar ótkizemiz jáne sonyń birin Qazaqstanda «Astana» halyqaralyq qarjy ortalyǵymen ótkizýdi josparlap otyrmyz. Biz shilde aıynda ol sharamyz ótedi dep úmittenemiz», - dedi Tatıana Valovaıa Joǵary Eýrazııalyq ekonomıkalyq keńestiń kezekti otyrysy aldynda qazaqstandyq jýrnalısterge bergen suhbatynda.

Buǵan deıin habarlaǵanymyzdaı, Reseıdiń Sochı qalasynda memleket basshylarynyń qatysýymen Joǵary Eýrazııalyq ekonomıkalyq keńestiń (JEEK) kezekti otyrysy ótedi.  

Sharaǵa Qazaqstan Prezıdenti Nursultan Nazarbaev, Reseı basshysy Vladımır Pýtın, Qyrǵyzstan prezıdenti Sooronbaı Jeenbekov, Belarýs basshysy Aleksandr Lýkashenko jáne Armenııa Premer-Mınıstri Nıkol Pashınıan qatysady.

Basqosýda Eýrazııalyq ekonomıkalyq odaq (EAEO) aıasyndaǵy kópbaǵytty yntymaqtastyqtyń túrli aspektileri, uıymnyń uıymdastyrý-kadrlyq baǵyttaǵy sharalary men aǵymdaǵy jumys barysy sóz bolady dep kútiledi.

QR Ulttyq ekonomıka vıtse-mınıstri Dana Júnisovanyń aıtýynsha, kún tártibine 15 másele qoıylǵan. Olardyń ekeýi shaǵyn quramda qaralady.

Aıta ketetin másele, basqosýdyń kún tártibindegi basty máselelerdiń biri EAEO-nyń halyqaralyq kelissózderi týraly kelisimge úshinshi eldermen, halyqaralyq uıymdarmen nemese halyqaralyq yqpaldastyq birlestikterimen qol qoıý bolyp tabylady.

Atalmysh kelisim úshinshi eldermen halyqaralyq kelisimder jasaý, olardy toqtatý jáne kúshin joıýdyń tártibin qalyptastyrady. Sondaı-aq kelissóz júrgizýshi delegatsııanyń jumysy men onyń basshysynyń ókiletiligin naqtylaıdy. Bul rette qujat kelissóz júrgizýshi delegatsııanyń kelissóz júrgizý pozıtsııasy men qujattardyń jobalaryn EAEO-ǵa múshe memlekettermen mindetti túrde kelisilýin qarastyrady.

Jıynda sonymen qatar, 2017 jyldyń 14 sáýirinde Bishkekte ótken JEEK  qorytyndysy boıynsha, memleket bashylarynyń tapsyrmalary negizinde daıyndalǵan EAEO janyndaǵy baıqaýshy memlekettiń mártebesi týraly erejeni bekitý kózdelip otyr.

JEEK-tiń osy jolǵy otyrysy barysynda Qyrǵyzstannyń EAEO týraly Kelisimine qosylýy týraly kelisimge ózgeris engizýge qatysty eki hattamaǵa qol qoıylatyny kútiledi. Atalmysh qujattar Qyrǵyzstannyń EAEO-nyń kedendik shekarasyndaǵy ótkizý pýnktteriniń ótkizý kezeńin odaqtyń keden talaptaryna sáıkestendirýde EAEO-ǵa múshe memleketterdiń arasynda kedendik tasymal bajdarynyń kólemin naqtylaý normatıvteriniń jańa merzimin qarastyrady.

Buǵan qosa, jıynda Armenııa men Qyrǵyzstannyń EAEO-ǵa múshe bolǵan 2 jyldaǵy jumys nátıjeleri sóz bolmaq.