EcoQolday iske qosylǵannan beri 23 myń tonna qaldyq qaıta óńdeldi

ASTANA. KAZINFORM — Qazaqstanda qaldyqtardy jınaý, tasymaldaý jáne qaıta óńdeý úderisin jeńildetýge baǵyttalǵan EcoQolday mobıldik qosymshasy 2024 jyldyń qyrkúıek aıynan bastap qoldanysqa engizildi. Jobany «Jasyl damý» aktsıonerlik qoǵamy iske asyrdy.

Platforma arqyly jeke jáne zańdy tulǵalar shyny, qaǵaz, karton, plastık qaptama men plenkany ótkizýge onlaın ótinim bere alady. Bul — qaldyqtardy qabyldaý men ótkizýdiń ashyq ári tsıfrlandyrylǵan formaty.

Ekologııa jáne tabıǵı resýrstar mınıstrliginiń málimetinshe, úkimet qaldyqtyń árbir túrine arnaıy ótemaqy mólsherlemesin bekitken:

• qaǵaz qaldyqtarynyń 1 kelisi úshin – 45,61 teńge;

• shyny qaptamanyń qaldyqtary – 57,25 teńge;

• polımerli qaptama – 71,76 teńge;

• jeńil jáne júk shınalary – 53,08 teńge.

EcoQolday arqyly qalaı jumys isteýge bolady?

1. Qosymshany júktep, tirkelý qajet;

2. Qaldyq ótkizýge ótinim qaldyrylady;

3. Jınaýshylardan usynystar qabyldanady;

4. Kelisim jasalyp, qaldyq tapsyrylady.

Qosymsha Google Play jáne App Store platformalarynda qoljetimdi.

EcoQolday — Ortalyq Azııada balamasy joq ekologııalyq joba. Qazirgi tańda platformada 64 kompanııa, 38 jınaýshy, 17 qaıta óńdeýshi jáne 9 tolyq tsıkldi kásiporynmen kelisimsharttar jasalǵan.

Qosymsha iske qosylǵan sátten beri 23,4 myń tonna qaldyq qaıta óńdeýge jiberildi. Onyń ishinde:
– qaǵaz qaldyqtary – 18,0 myń tonna,
– shyny – 5,1 myń tonna,
– plastık – 0,3 myń tonna.

Mamandardyń aıtýynsha, bul joba elimizdegi qaldyqtardy basqarý júıesin jetildirýge jáne azamattardyń ekologııalyq jaýapkershiligin arttyrýǵa yqpal etedi.

Aıta keteıik, Qazaqstanǵa ekologııalyq qaýipti shınalar zańsyz tasymaldanǵan.