EcoJer qaýymdastyǵy: Ekologııalyq kodeks - óte progressıvti qujat

NUR-SULTAN. QazAqparat - Qazaqstan «EcoJer» óńirlik ekologııalyq bastamalar qaýymdastyǵynyń atqarýshy dırektory Qýanysh Baltabaev osylaı dep esepteıdi.

Onyń aıtýynsha, jańa ekokodeks ónerkásiptik kásiporyndardy antropogendik áserdi tómendetýge yntalandyrýǵa kóbirek baǵyttalmaq.

Al jergilikti atqarýshy organdar qorshaǵan orta sapasyn jaqsartý jumystaryn kúsheıtedi.

Sarapshy zań jobasyndaǵy «Lastaýshy tóleıdi» prıntsıpi men tabıǵat paıdalanýshylardyń tólemderi 100% tabıǵat qorǵaý sharalaryna jumsalatynyn asa mańyzdy mehanızm retinde qarastyryp otyr.

«Sonymen birge biz qorshaǵan ortaǵa áserge qatysty sheshimderdi qabyldaý protsesinde qoǵam ókilderiniń rólin joǵarylatý bastamasyn qoldadyq. Jańa Ekologııa kodeksinde ekoqaýymdastyq pen qoǵam ókilderi qorshaǵan ortaǵa antropogendik áserin tıgizetin iri jobalardy, onyń ishinde kásiporyndar qurylysyn talqylaýǵa qatysatyny naqty jazyldy»,- deıdi Q.Baltabaev.

Ol sondaı-aq kodekske sáıkes ekologııalyq aqparattyń ashyq bolatynyn oń ózgeris dep sanaıdy.

«Sondyqtan halyq ta, qoǵamdyq uıymdar da bul málimetterdi surap saraptama jasaı alady. Osylaısha, tabıǵatty lastaýshy kásiporyndarmen argýmentke negizdelgen dıalog júrgizýge múmkindik týady», - dep atap ótti «EcoJer ókili.

Sarapshy qazaqstandyq iri ónerkásiptik kásiporyndardyń eń ozyq qoljetimdi tehnologııalarǵa (EOQT) kóshýin de kodekske engizilgen mańyzdy jańalyq dep atady.

«Árıne, bul shara qazaqstandyq ekologııalyq qaýymdastyqtyń úlken úmitin týdyrady. Biz qaýymdastyq retinde rasymen de eń jaqsy tehnologııalardy qabyldaýdy qoldaımyz. Sondaı-aq, ımportty almastyrýǵa, otandyq óńdeý ónerkásibin damytýǵa basa nazar aýdarǵan jón. Ónerkásiptik alyptar úshin jańa súzgiler, qazandar, barynsha tıimdi energetıkalyq tıimdi quraldar ózimizde jasalýy tıis», - dep atap ótti Q.Baltabaev.

Aıta keteıik, búgin QR Prezıdenti Qasym-Jomar Toqaev búgin jańa Ekologııalyq kodekske qol qoıdy.

Ekologııa mınıstri Maǵzum Myrzaǵalıevtiń sózinshe, birinshi kezeńde lastanýdyń 80%-y tıesili munaı-gaz, taý-ken metallýrgııasy, hımııa jáne elektr energetıkasy salalarynyń 50 iri kásipornyn eń ozyq qoljetimdi tehnologııalarǵa kóshirý josparlanǵan.

Qazir eń ozyq qoljetimdi tehnologııalardyń salalyq anyqtamalyqtaryn daıyndaý úshin iri kásiporyndarǵa keshendi tehnologııalyq aýdıt júrgizilip jatyr.

Tutastaı alǵanda, jańa kodekste eldegi qorshaǵan ortanyń jaı-kúıin jaqsartý jónindegi progressıvti sharalardyń tutas kesheni qabyldanǵan.