EAEO sheńberinde ortaq naryqtar qurýǵa yqpal etetin birqatar qujat qabyldandy
ASTANA. KAZINFORM - Eýrazııalyq ekonomıkalyq komıssııanyń kezekti keńesiniń otyrysynda Eýrazııalyq ekonomıkalyq odaq sheńberinde ortaq naryqtar qurýǵa yqpal etetin birqatar qujattar qabyldandy. Qazaqstandyq tarapty vıtse-premer Serik Jumanǵarın basqardy, dep habarlaıdy Úkimettiń baspasóz qyzmeti.
Bir memlekettiń brokerleri men dılerlerin EAEO-ǵa múshe basqa memleketter bırjalarynyń uıymdastyrylǵan saýda-sattyqtaryna qatysýǵa jiberý týraly keńeste maquldanǵan kelisim – bul ortaq bırjalyq keńistikti qalyptastyrý jolyndaǵy mańyzdy qadam. Keńes músheleri maquldaǵan ǵylymı-zertteý jumystaryn júrgizý jónindegi ákimshilik yntymaqtastyq týraly kelisim osy qyzmetter naryǵyn ashýǵa jáne yryqtandyrýǵa baǵyttalǵan. Qujat EAEO elderiniń resmı saıttarynda erkin qoljetimdi aqparat tizimin anyqtaıdy. Oǵan qoldanystaǵy normatıvtik-quqyqtyq aktiler, is-sharalar, naryq qatysýshylary týraly derekter jáne ǵylymı-zertteý jumystaryn uıymdastyrý kezinde taraptardyń tıimdi ózara árekettesýin qamtamasyz etetin basqa da qajetti aqparat kiredi. Bul qujat ǵylymı-zertteý qyzmetteriniń biryńǵaı naryǵynda ózara tıimdi baılanystardy damytýǵa yqpal etetin bolady.
Sondaı-aq Eýrazııalyq odaqqa múshe memleketterdiń avtomobıl joldarynda júrip-turý kezinde kólik quraldarynyń ruqsat etilgen salmaǵy, ostik júktemeleri jáne gabarıtteri týraly kelisimge qol qoıyldy. Qujat tranzıttik áleýetti tıimdi paıdalanýǵa, eýrazııalyq dálizder arqyly halyqaralyq kólik tasymaldarynyń tıimdiligin arttyrýǵa jáne avtojol ınfraqurylymyn saqtaýǵa baǵyttalǵan.
EEK Keńesinde 2020 jyly Qazaqstan tarapynan usynylǵan teri buıymdaryn tańbalaýǵa qatysty tásilderdi ózgertý boıynsha jol kartasy bekitildi.
EAEO-da teri buıymdaryn mindetti tańbalaý 2016 jyly engizildi. 2020 jyly Qazaqstan osy taýarlardy radıojıilikti RFID-tańbamen belgilengen biregeı kodtyń ornyna eki ólshemdi Data Matrix shtrıh-kodymen belgileýdi usyndy. Ártúrli deńgeıdegi talqylaýlar men jumys toptarynyń nátıjesinde teri buıymdaryn tańbalaýdyń jańa tártibine kóshý boıynsha jol kartasyn ázirleý týraly sheshim qabyldandy. EEK Keńesinde maquldanǵan qujat tehnologııalyq qujattarǵa, kedendik retteý salasyna jáne basqa da baǵyttarǵa ózgerister engizýdi qarastyrady. Teri buıymdaryn Data Matrix formatyndaǵy shtrıh-kodpen tańbalaýǵa kóshýdiń barlyq rásimdik máselelerdi 2025 jylǵy sáýirde aıaqtaý josparlanyp otyr.
Sonymen qatar Odaq aıasynda medıtsınalyq buıymdardy aınalymǵa shyǵarý qaǵıdasy men biryńǵaı talaptary týraly kelisimge ózgerister engizildi. Jańa ózgerister Odaq aıasynda óndirilgen jáne úshinshi elderden ákelingen medıtsınalyq buıymdarǵa biryńǵaı talaptardy saqtaý qajettiligin qamtamasyz etýge baǵyttalǵan.
«Otyrys sheńberinde ózara saýda, tsıfrlandyrý, kedendik-tarıftik jáne tehnıkalyq retteý, halyqaralyq yntymaqtastyq, sanıtarlyq jáne fıtosanıtarlyq sharalaryn qoldanýdy qamtıtyn 50-den astam másele qaraldy»,-delingen habarlamada.