EAEO-nyń biryńǵaı agrarlyq jáne azyq-túlik naryǵyn qurýymyz qajet – QR Prezıdenti

NUR-SULTAN. QazAqparat – Eýrazııalyq ekonomıkalyq odaqtyń biryńǵaı agrarlyq jáne azyq-túlik naryǵyn qurýymyz qajet. Bul týraly Joǵary eýrazııalyq ekonomıkalyq keńestiń otyrysynda Qazaqstan Prezıdent Qasym-Jomart Toqaev aıtty, dep habarlaıdy QazAqparat tilshisi.

«BUU málimetterine sáıkes, 2020 jyldyń qorytyndysynda azyq-túlik taýarlarynyń álemdik baǵasy sońǵy úsh jylda eń joǵary boldy. Osy jyldyń basynan bastap álemdik azyq-túlik baǵasynyń ındeksi 116 tarmaqty qurady. 2030 jylǵa qaraı azyq-túlikke suranys keminde 35 paıyzǵa artatyndyǵy kútiledi. Bul alańdatarlyq tendentsııa. Bizdiń elderimizdiń árqaısysy azyq-túlik taýarlary óndirisiniń kólemin arttyrýǵa qajetti áleýetke ıe. Degenmen, ishki naryqty qorǵaý jónindegi shekteý is-sharalary agroónerkásip kesheniniń damýyn tejep, azyq-túlik tapshylyǵyna alyp kelýi múmkin»,- dedi Memleket basshysy.

Qazaqstan Prezıdenti jekelegen jaǵdaıda shekteý is-sharalaryn ýaqytsha qoldanýǵa bolatyndyǵyn, biraq, mundaı shekteýler odaq elderine taralmaýy tıistigin basa aıtty.

«Bizdiń aldymyzda agroónerkásip keshenine ınvestıtsııa kólemin arttyrý, odaqtyń biryńǵaı agrarlyq jáne azyq-túlik naryǵyn qurý mindeti tur. Aldyńǵy qatarly jáne ınnovatsııalyq tehnologııalardy engizý, qosylǵan joǵary quny bar azyq-túlik óndirisin arttyrý maqsatynda bizdiń agro-ǵylymı mekemelerimizdiń ózara is-qımylyn kúsheıtýimiz qajet. Aýyl sharýashylyǵy ónimderin úshinshi elderdiń naryqtaryna eksporttaýdy da arttyrý boıynsha birlesken kúsh-jigerimizdi jandandyrý qajet dep esepteımin. Komıssııaǵa bul baǵytta jan-jaqty jáne naqty usynystar ázirleýdi tapsyrý maqsatqa saı dep oılaımyn», - dedi Qasym-Jomart Toqaev.