EAEO men Qytaı saýda-ekonomıkalyq kelisimdi rásimdedi
Qazaqstan tarapynan kelisimdi QR Premer-Mınıstriniń birinshi orynbasary Asqar Mamın rásimdedi. Sondaı-aq, Armenııanyń vıtse-premeri Tıgran Avınıan, Belarýstiń birinshi vıtse-premeri Vasılıı Matıýshevskıı, Qytaıdyń mınıstr dárejesindegi xalyqaralyq saýda ókili Fý Tszın, Qyrǵystannyń vıtse-premeri Zamırbek Asqarov, Reseıdiń vıtse-premeri Dmıtrıı Kozak jáne EAEO kollegııanyń tóraǵasy Tıgran Sarkısıan óz qoldaryn qoıdy.
Aıta keteıik, búgin tańerteń AEF-2018 aıasynda taǵy bir kelisimge qol qoıyldy. Atalǵan qujat boıynsha EAEO pen Iran arasynda ýaqytsha erkin saýda aımaǵyn qurý josparlanǵan. Taraptar birqatar taýarlar boıynsha kedendik baj salyǵyn 3 jylǵa deıin tómendetýge ýaǵdalasty.
«Shyny kerek, Eýrazııalyq ekonomıkalyq odaqty qurý kezinde Qytaımen ózara qarym-qatynas jasaý jaǵy da eskerilgen bolatyn. Sebebi Qytaı iri ekonomıkalardyń qataryna kiredi. Budan bes jyl buryn Qytaı ishki suranysty ósirýge den qoıdy. Osy oraıda bizdiń kásipkerlerimiz úshin biraz múmkindikter ashylyp otyr. Kelisimde kedendik baj salyǵy jaıynda aıtylmaǵan. Degenmen, ózara yntymaqtastyqtyń naqty joldary kórsetilgen. Búginde EAEO pen Qytaıdyń ózara saýda aınalymy 100 mlrd dollarǵa jetti. Al odaqtyń osy elge shyǵarǵan eksporty 40 protsentke ósti», - dedi T.Sarkısıan.
Atap aıtqanda, Iran 246 taýarǵa, al Eýrazııalyq ekonomıkalyq odaq elderi 175 taýarǵa tarıf jaǵynan jeńildik jasaıtyn bolady. Máselen, Qazaqstannyń 102 eksporttyq taýary boıynsha Iranda kedendik baj salyǵy tómendeıdi. Sonyń ishinde sıyr eti, qoı eti, sary maı, noqat, burshaq, jasymyq, arpa, kúrish, ósimdik maılary, makarondar, kondıterlik ónimder, bolat prokaty, relster, akkýmýlıatorlar jáne taǵy basqa ónimder bar. Óz kezeginde Iran memleketi EAEO-ǵa piste, qurma, injir, meıiz, asshaıan, apelsın, lımon, laım, kondıterlik ónimder, shyryndardyń keıbir túrleri, qurylys boıaýlary, laktar, ydys, jýý quraldary, kilemder, plastmassa buıymdary sııaqty taýarlardy 10 protsentke deıingi jeńildikpen tasymaldaı alady. Al alma, qııar, tomattar sııaqty ırandyq ónimderge tek maýsymdyq, naqty aıtqanda, qarasha men naýryz aralyǵynda ǵana jeńildikter beriledi.
