EAEO elderine ortaq valıýta týraly tipti talqylaýdyń qajeti joq - EEK múshesi
«Álbette, ekonomıkalyq odaq týraly kelisimdi daıarlaǵan kezde biz óz saıasattarymyz qaı turǵydan kelisilý kerektigi týraly kóp pikir talastyq. Makroekonomıkalyq salada kelisilgen saıasat bolýy kerek pe, álde bizge ortaq valıýta kerek pe degen sekildi kóptegen oı-paıymdar boldy. Biz eýropalyq ádisti óte jiti zerttep, olardan qarapaıym ǵana birneshe sheshim shyǵardyq. Eń birinshiden, ıntegratsııalaný - óte buralań da kúrdeli jol. Biz barynsha myǵym birlese jumys júrgizgen jaǵdaıda da, eýropalyq joldy qaıtalaýdyń qajeti joq. Sebebi, ekonomıkalyq odaqty birinshi bastaǵandar birshama kóp qatelikterge jol beredi», - deıdi Tatıana Valovaıa elordada ótip jatqan «AHQO jáne EEK: seriktestik kókjıegi» atty paneldik otyrysta.
Onyń aıtýynsha, Eýropalyq odaqtyń jaǵymdy tájirıbesinen bólek, EAEO olardyń qatelikterinen de sabaq alýy kerek.
«Bul turǵyda eýropalyq tájirıbeni óte jiti zertteı kele biz - ortaq valıýta týraly sóz qozǵaý áli erte ekenin, tipti «ol týraly aıtýdyń qajeti bar ma?» degen sheshimge keldik. Nege? Biz ózimizdiń ekonomıkalyq qurylymdarymyzdy saraptadyq. Bizdiń ekonomıkalyq qurylymdardyń Eýropalyq odaqtan aıyrmashylyǵy kóp. Máselen, ózara saýda-sattyqtyń úlesi bizde 14,5 paıyz ekenin aıta ketý kerek. Al Belarýs sekildi elde bul kórsetkish saýda-sattyqtyń 50 paıyzyn quraıtynyn eskerý kerek. Sebebi, Qazaqstan men Reseı álemdik energııa óndirý turǵysynda aıtarlyqtaı salmaqty oıynshylar. Al Eýropa odaǵynda ózara saýda-sattyqtyń úlesi 66 paıyzǵa jetedi. Demek, Eýropa odaǵy elderiniń kásipkerleri biryńǵaı valıýtany engize otyryp, birshama qarajatyn únemdep qaldy. Osyny eskere otyryp, biz ortaq valıýtany engizýge asyqpaý kerektigin, tipti bul taqyrypty talqylaýdyń qajeti joq ekenin túsindik», - deıdi ol.
