EAEO elderi arasynda eń arzan kúnbaǵys maıy Qazaqstanǵa tıesili
ASTANA. KAZINFORM – 10 sáýirde Saýda jáne ıntegratsııa mınıstrligi, Aýyl sharýashylyǵy mınıstrligi jáne Maıly daqyldardy óńdeýshilerdiń ulttyq assotsıatsııasy áleýmettik mańyzy bar azyq-túlik taýarlarynyń baǵalaryn turaqtandyrý sharalaryn júzege asyrý boıynsha yntymaqtastyq týraly memorandýmǵa qol qoıý týraly kelisimge keldi.
Memorandýmnyń negizi — taraptardyń baǵa turaqtylyǵyn qamtamasyz etý jáne bıznestiń áleýmettik jaýapkershiligin arttyrýǵa degen ózara múddeliligi.
— Memorandým aıasynda Maıly daqyldardy óńdeýshilerdiń ulttyq assotsıatsııasy óndiris jáne halyqqa bólshek saýdada satylym úshin óndirýshilerden baǵalardy turaqtandyrý mindettemesin óz moınyna aldy. Aýyl sharýashylyǵy mınıstrligi otandyq óńdeý qýattaryn arttyrý maqsatynda shıkizat bazasyn ulǵaıtýdy yntalandyrady, — delingen habarlamada.
Saýda jáne ıntegratsııa mınıstrligi memorandým aıasynda baǵa monıtorıngin júrgizip, kúnbaǵys maıyn eksportqa ilgeriletý bastamasyn kóteredi jáne el ishindegi naryqta kúnbaǵys maıyn satý kezinde saýda ústemesin saqtaýyn baqylaýdy qamtamasyz etedi.
Osy sııaqty memorandýmdar buǵan deıin de birneshe ret jasalyp, áleýmettik mańyzy bar azyq-túlik taýarlarynyń baǵalaryn turaqtandyrý boıynsha bıznespen kelisimder jasaýǵa múmkindik berdi.
Qabyldanyp jatqan sharalardyń arqasynda, álemdegi kúnbaǵys maıy baǵasynyń ósý tendentsııalaryna qaramastan, elimizde kúnbaǵys maıynyń baǵasy turaqty ári EAEO elderi arasynda baǵany eń tómengi deńgeıde saqtap otyr.
Aıta ketelik áleýmettik azyq-túlik baǵasyn qymbattatqandarǵa qansha teńge aıyppul salynatyny týraly jazǵan edik.