EAEO-daǵy básekelestik salasyndaǵy qadamdar aıqyndaldy
«2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly ratıfıkatsııalaýǵa usynylǵan hattama «Alǵashqy iri» Hattama bolyp sanalady. Ol boıynsha Eýrazııalyq ekonomıkalyq odaqqa múshe memleketter sarapshylarynyń birlesken jumysy tórt jyldan astam júrgizildi. Hattama Eýrazııalyq ekonomıkalyq odaq týraly shartqa túzetýlerdiń úsh blogyn engizýdi kózdeıdi», - dedi Saýda jáne ıntegratsııa mınıstri Baqyt Sultanov.
Birinshiden, básekelestik salasyndaǵy ózgerister qamtylǵan. Eýrazııalyq ekonomıkalyq odaqqa múshe memleketterdiń sharýashylyq júrgizýshi sýbektileri básekelestik sharttaryn buzǵan jaǵdaıda, Komıssııaǵa eskertýler men aldyn ala eskertýler berýge múmkindikter eskerilgen. Aldyn ala eskertý alǵannan keıin sharýashylyq júrgizýshi sýbektiler ereje buzý jaǵdaılaryn ózderi joıa alady, zardap shekken sýbektiler talaptardy buzǵandarmen kelise alady. Básekelestikke qarsy tájirıbe jalǵasqan jaǵdaıda, belgilengen aıyppuldar qoldanylatyn bolady.
Ekinshiden, Eýrazııalyq ekonomıkalyq komıssııaǵa energetıka, tehnıkalyq retteý, makroekonomıka, básekelestik jáne veterınarııa salalarynda qosymsha ókilettikter berý qarastyrylǵan. Bul ókilettikter Eýrazııalyq ekonomıkalyq odaq aıasynda qol qoıylǵan halyqaralyq sharttardyń, onyń ishinde Eýrazııalyq ekonomıkalyq odaq týraly sharttyń saldary bolyp sanalatynyn jáne Komıssııa qyzmetiniń ashyqtyǵyn qamtamasyz etýge baǵyttalǵanyn atap ótý qajet.
«Mysaly, tehnıkalyq retteý salasynda Komıssııa Keńesine múshe memleketterdi akkredıtteý jónindegi organdardyń ózara salystyrmaly baǵalaýdy júzege asyrý tártibin bekitý boıynsha ókilettikter beriledi. Odaqtyń qoldanystaǵy quqyǵynda oǵan sáıkes múshe memleketterdi akkredıtteý jónindegi organdar ózara salystyrmaly baǵalaýdy júzege asyratyn norma bar ekenin atap ótken jón. Alaıda búgingi kúni salystyrmaly baǵalaý júrgizýdiń jeke tártibi bekitilmegen», - dedi B. Sultanov.
Shartta Komıssııaǵa qoldanystaǵy normalardy naqtylaýǵa baǵyttalǵan ókilettikterdi berýge arnaıy túzetýler de bar.
Úshinshiden, tehnıkalyq túzetýler qamtylǵan.
«Sharttyń normalaryn praktıkada neǵurlym tolyq jáne durys qoldaný maqsatynda Shart boıynsha bes jyldan astam jumys - onyń jeke bólikterin túzetý qajet ekenin anyqtady. Bul negizinen olqylyqtardy joıýǵa jáne Eýrazııalyq ekonomıkalyq odaq týraly shart erejeleriniń redaktsııasyn naqtylaýǵa baǵyttalǵan tehnıkalyq sıpattaǵy túzetýler. Tutastaı alǵanda, zań jobasy respýblıkalyq bıýdjetten qarjy shyǵyndaryn talap etpeıdi jáne teris áleýmettik- ekonomıkalyq jáne quqyqtyq saldarǵa ákep soqpaıdy», - dedi Baqyt Sultanov.
