E-zańnama: Júıeniń júıriktigi 1 mıllıard paraqty 1 mınýtta aqtarýǵa qaýqarly
Dýman Súleımenovtiń aıtýynsha, qazirgi tańda elimizdegi normashyǵarmashylyq protseste birtalaı problemalar bar. Biryńǵaı aqparattyq keńistiktiń joqtyǵy, quqyqtyq monıtorıng pen normashyǵarmashylyq protsesi arasyndaǵy ózara baılanystyń bolmaýy, quqyqtyq monıtorıngtiń adamnyń qatysýymen júrgizilýi, NQA ázirleýge kirispes buryn taldaý júrgizýge arnalǵan quraldardyń joqtyǵy... Osynyń bári naqty ózgeristerdi talap etedi.
«Osy máseleni sheshý úshin Ádilet mınıstrligi tsıfrlyq damý, qorǵanys jáne aeroǵarysh ónerkásibi mınıstrligimen jáne «Zerde» AQ-men birlesip «E-zańnama» biryńǵaı birtutas júıesin qurý boıynsha jumys júrgizýde. «E-zańnama» júıesin qabyldaýdyń maqsaty - tıisti sheshimder qabyldaý úshin memlekettik organdar júrgizetin zańnamanyń salalaryn, quqyq qoldaný tájirıbesindegi máselelerdi keshendi taldaýdyń tıimdiligin arttyrý. «E-zańnama» júıesiniń ereksheligi - «jasandy ıntellekt» elementterin qoldaný», - deıdi ol
Memlekettik organdarda aqparattyń úlken aǵyny, zań jobalary, qaýlylar, azamattardyń ótinishteri boıynsha kún saıynǵy hat almasýlar bolyp jatyr.
«Eger barlyq aqparatty qorytatyn bolsaq, mıllıardtaǵan paraqtardy aqtaramyz. Ony adam fızıkalyq turǵydan bárin oqyp, qajetti nársesin ala almaıdy. Sonymen qatar, mundaı aqparat kólemin BigData jáne jasandy ıntellekt tehnologııalaryn qoldana otyryp, «Internet-resýrstardan aqparat jınaýǵa arnalǵan robot» óńdeı alady. Bir mınýt ishinde bul robot taldaý júrgizip, suratylǵan aqparatty beredi», - deıdi Dýman Súleımenov.
Big data - naqty tapsyrmalar men maqsattarda paıdalaný úshin qurylymdastyrylǵan jáne qurylymdastyrylmaǵan derekterdi óńdeýdiń túrli quraldary.
«Big data barlyǵyn óz oryndaryna ornalastyrady. Sizge derekterdiń úlken sanynan olardy odan ári tıimdi qoldaný úshin naqty jáne qajetti aqparatty alýǵa kómektesedi. Budan basqa, júıede «Bilim bazasy» jumys isteıdi. Onda ártúrli aqparattar, onyń ishinde robot kórsetkishter boıynsha suryptaıtyn (oń, teris, beıtarap) azamattardyń ótinishteri men áleýmettik jelilerdegi pikirler jınaqtalyp, taldanady. Júıe zańnama salalary, jıi qoıylatyn suraqtar, aımaqtar, áleýmettik jaǵdaı boıynsha statıstıkany júrgizedi. Osylaısha, memlekettik organdar halyqtyń kóńil-kúıin jáne qandaı máselelerdi, onyń ishinde zańnamalyq deńgeıde sheshý qajettigin kóre alady», - deıdi departament dırektory.
Bundaı alań zańnamany, onyń quqyq qorǵaý jáne sot tájirıbesin jan-jaqty taldaýǵa, sonyń ishinde qalyptasqan aqparattar massıvin paıdalanýǵa múmkindigin beredi. Ol sondaı-aq búgingi kúndegideı, tek bıznes-qoǵamdastyqtyń ǵana emes, quqyq qoldanýshylardyń ártúrli toptarynyń kózqarastary turǵysynan zańnamanyń qajettilikterin tereńirek taldaýǵa jol ashady.
«Qazirgi zamanǵy memlekettik-quqyqtyq ǵylym men praktıkada aqparattyq júıeniń mundaı modeli joq. Alaıda keıbir elder norma shyǵarý protsesin avtomattandyrý nemese úlken derekterdi taldaý maqsatynda jekelegen elementterdi qoldana bastady. Mysaly, Avstralııa men Jańa Zelandııada jergilikti jáne mýnıtsıpaldyq úkimettiń bilim bazasy qoldanylady. AQSh-ta normashyǵarmashylyq salasynda tájirıbe almasý úshin bilim bazasy qoldanylady. Qazaqstanda ázirlengen «E-zańnama» aqparattyq júıesi qoǵamymyzdy damytý maqsatynda zań shyǵarý jumysynyń sapasyn arttyrý jónindegi negizgi faktorlardyń biri bolýy tıis», - dep túıdi Dýman Súleımenov.
