Dzıýdodan ulttyq qurama bapkeri: Alda úlken dodalar kútip tur
- Tórt kúnge sozylǵan el birinshiliginen keıin qandaı oı túıdińiz? Qaı salmaq dárejesinde básekelestik joǵary ekeni ańǵaryldy? Baıqaǵanymyz, keıbir salmaqtarda belgili balýandar qarsylastaryna ese jiberip qoıdy. Bul básekelestiktiń joǵary bolǵanyn kórsete me?
- Eshqandaı beldesýdi bólip-jaryp aıta almaımyn. Maǵan unaǵany, 73 keli salmaqta básekeler asa tartysty ótti. Sondaı-aq, 60 jáne 66 keli salmaqtarynda da jankúıerler qyzyqty beldesýler tamashalady degen oıdamyn. Bul salmaqtarda balýandar arasynda básekelestik baıqaldy.
Atap aıtsaq, 60 kelide atyraýlyq Qanat Seıilhan chempıon atandy. Ol byltyr el birinshiliginde qola júldeger atanǵan edi. Bıyl jaqsy daıyndyqpen kelgen. Babynda ekenin kórsetti. Chempıon atandy. Bul - óte jaqsy kórsetkish. Ózderińiz biletindeı, atalǵan salmaqta Maǵjan Shámshadın men Baýyrjan Narbaev bolǵan. Ekeýi de jarysqa keldi. Alaıda, birinshi jáne ekinshi aınalymnan óte alǵan joq.
Endi 66 keli salmaq dárejesine keletin bolsaq, byltyr chempıon bolǵan balýan bıyl úshinshi oryndy qanaǵat tutty. Al burynnan kúresip júrgen Eset Qýanov degen shákirtimiz bıyl jaqsy daıyndalyp kelgenin ańǵartty. Nátıjesinde jeńimpaz tuǵyryna kóterildi.
- Jarys barysynda ulttyq quramada synǵa túsip júrgen Maǵjan Shámshadın men Ǵusman Qyrǵyzbaev syndy balýandar qarsylastaryna ese jiberip qoıdy. Bul jóninde qandaı pikirdesiz?
- Aldymen Ǵusman Qyrǵyzbaev jaıynda aıta ketsem, ol jarys barysynda sál syrqattanyp turǵany baıqaldy. Tymaý bolsa da, tatamıge shyǵýǵa bel baılady. Sondaı-aq, ol jyl boıyna birneshe jarysqa qatysty. Bálkim, sharshańqylyq baıqalǵan shyǵar.
Jalpy, saıys barysynda bári de bolady. Árkim óziniń qateliginen sabaq alady. Bul balýandarǵa aldaǵy ýaqytta qatelik jasamaýǵa múmkindik jasaıdy. Tatamı tórindegi tartysty básekeler aldaǵy úlken jetistikterge jol ashady. Balýandar osy maqsatta tynbaı ter tókti. Daıyndyǵy joǵary bolǵany jeńimpaz qatarynan kórindi. Al bıyl jetistikke qol jetkize almaǵany, aldaǵy jyldarda ol olqylyqtyń ornyn toltyrady. Ony bıylǵy birinshilik barysynda aıqyn ańǵardyq. Sondyqtan balýandarǵa únemi daıyndyǵyn pysyqtap, babynda bolýǵa kóńil bólýi tıis. Sonda ǵana joǵary nátıjeni baǵyndyrýǵa jol ashylady.
- Endi aýyr salmaqtaǵy balýandar beldesýine toqtala ketelik. Onda qandaı beldesýler kóńilińizden shyqty?
- Bıyl 100 keliden joǵary salmaqta Abaı oblysynyń balýany Ádil Orazbaev jeńimpaz atandy. Ol byltyr fınalda súringen edi. Sol ketken qateliginiń ornyn toltyrdy. Negizinde el birinshiliginde iriktelgen balýandardy aldaǵy ýaqytta túrli jarystarǵa alyp baramyz. Oǵan alǵashqy úsh oryn alǵan sportshylar tańdap alynady. Olardy úlken dodalarda synap kóremiz.
- Alda qandaı jarystar kútip tur? Balýandar qandaı básekelerde baǵyn synap kóredi?
- Bıylǵy jyldyń enshisinde halyqaralyq deńgeıdegi eki úlken jarys kútip tur. Atalǵan jarystar nátıjesi boıynsha bıylǵy jyldy qorytyndylaımyz.
Al aldaǵy jyly Portýgalııa elinde taǵy úlken jarys kútip tur. Odan keıin balýandar Frantsııada taǵy bir básekede baq synaıdy. Osylaısha jarystar jalǵasa beredi. Sol jarystarda el birinshiliginde úzdikter qatarynan kóringen balýandar óz sheberligin kórsete alady.
- El birinshiliginde jastardyń beldesýi kóńilińizden shyqty ma?
- Bıylǵy el birinshiliginde báseke tartysty ótkenin aıta keteıik. Jas balýandar da kóńilden shyqty. Olardyń babynda bolýy bizdi qýantty. Balýandar tarapynan osyndaı damýdy baıqadyq. Bul - qýanarlyq jaǵdaı. Sheberligi ósip kele jatqan jastar barshylyq. Aldaǵy ýaqytta olardyń qabilet-qarymyn, sheberligin tarazylaıtyn bolamyz.
- Alda - Parıj Olımpıadasy. Oǵan daıyndyq barysy qalaı bolyp jatyr? Oǵan upaı jınaý bastalyp ketti emes pe?
- Ras, upaı jınaý jarystary bastaldy. Aldaǵy jyldyń mamyr aıyna deıin jınalǵan upaıdyń jartysy ǵana esepteledi. Odan keıingi upaılar tolyqtaı jazylady. Soǵan qaramastan árbir jarystyń mańyzy zor. Árıne, Olımpıadaǵa beriletin joldamany barlyǵynan kútemiz. Ol ýaqytta qaı balýan babynda bolady? Upaıdyń kim kóp jınaıdy? Solar dúbirli dodaǵa baratyn bolady.
- Jastarǵa qandaı úmit artasyz?
- Olımpıadaǵa baratyn balýandar qatarynda jastarǵa de múmkindik beriledi. Barlyǵy árkimniń daıyndyǵyna baılanysty ǵoı. Jastarda solaı upaı jınap jatsa, keremet bolady.
Aıtqanymyzdaı, alda kóptegen jarystar kútip tur. Olardyń árbirinde balýandar sheberligin jetildiredi. Sol arqyly tájirıbesin arttyrady. Shákirtterime sondaı senim artamyn.
- Áńgimeńizge raqmet. Qazaqstandyq dzıýdoshylarǵa úlken jetistikter tileımiz. Aldaǵy jarystarda joǵary jetistikpen eldi qýanta berińizder demekpiz.
- Cizderge de raqmet.
Foto: sports.kz
