Djo Baıden Parkınson aýrýyna shaldyqpaǵan — Aq úı

ASTANA. KAZINFORM — Aq úı taǵy da AQSh prezıdenti Djo Baıdenniń densaýlyǵyna qatysty alańdaýshylyqty seıiltýge tyrysyp, jýrnalısterge onyń Parkınson aýrýymen aýyrmaıtynyn aıtty, dep jazady VVS. 

Jýrnalısterdi bárinen buryn nevropatolog ári Parkınson aýrýynyń mamany Kevın Kannardtyń Aqúıge ne úshin barǵany qyzyqtyrdy.

Amerıkalyq BAQ-tyń habarlaýynsha, Vashıngton mańyndaǵy Ýolter Rıd ulttyq áskerı medıtsına ortalyǵynda jumys isteıtin Kannard ótken jyldyń tamyzynan 2024 jyldyń naýryzyna deıin Aq úıge segiz ret kelgen.

Onyń Aq úıge kirýi jalpyǵa qoljetimdi kirý jýrnalynda tirkelgen. Kezdesýdiń birinde prezıdenttiń emdeýshi dárigeri Kevın O’Konnor kelýshi retinde kórsetilgen.

Karın Jan-Per qaýipsizdik sebepterin alǵa tartyp, Aq úıge qandaı mamandar kelgenin aıtýdan bas tartty.

Osy jyldyń basynda Aq úı dárigeri Kevın O’Konnor Djo Baıdendi tekserý kezinde Parkınson aýrýynyń belgileri tabylmaǵanyn aıtty.

27 maýsymda Donald Tramppen bolǵan sátsiz debattan keıin Aq úıge jáne jeke Djo Baıdenge qysym kúsheıdi.

Alaıda, Baıden prezıdent saılaýyna túsýge daıyn ekenin aıtady.

Buǵan deıin Kongrestiń bes demokraty (Tehas, Arızona, Illınoıs, Massachýsets jáne Mınnesotadan kelgen Ókilder palatasynyń músheleri) Baıdendi saılaýdan bas tartýǵa ashyq túrde shaqyrǵan.

Olarǵa dúısenbige qaraǵan túni Vashıngton shtatynyń kongresmeni Adam Smıt qosyldy.

Dúısenbi kúni Djo Baıden MSNBC-tiń tańǵy Morning Joe shoýyna kútpegen jerden qońyraý shalyp, ony prezıdenttik básekeden shyǵýǵa shaqyrǵandardan kóńili qalǵanyn aıtty.

«Meniń saılaýǵa túsýime qarsylyq bildirgender ózime qarsy shyqsyn. Prezıdenttikke úmitker bolyp, basymyz qosylǵanda meni debatqa shaqyrsyn», — dedi ol.

Birinshi hanym Djıll Baıden de kúıeýin qoldaıtynyn ashyq aıtty.