Djeıms Bondtyń £900-ǵa alynǵan kóligi restavratsııadan keıin £1 mln dep baǵalandy
ASTANA. KAZINFORM — Bul model Djeıms Bond qoldanǵan kólikterdiń biri retinde tanymal, dep habarlaıdy Kazinform agenttiginiń menshikti tilshisi.
Brıtandyq sýpershpıon jaqsy kóretin Aston Martin DB5 alǵash ret 1964 jylǵy «Goldfınger» fılminde Djeıms Bondtyń basqarýynda paıda bolyp, sodan beri bondıananyń eń tanymal belgileriniń birine aınaldy.
Dánekerleýshi jáne avtoservıs ıesi — 71 jastaǵy Djon Ýılıams bul modeldi alǵash ret jas kezinde kórgen jáne oǵan qyzyqqany sonshalyqty 1973 jyly qolma-qol £900 jınap (búgingi kúnmen eseptegende shamamen £15 myń), ózi turyp jatqan Ýelsten Londonǵa jolǵa shyqqan.
On toǵyz jasar jigit 1965 jylǵy sırek Vantage qozǵaltqyshy bar kúmis tústi DB5 modelin óz kózimen kórý úshin birneshe saǵat jol júrgen. Dál osyndaı kólikti Shon Konnerı mingen.
Ýılıams satyp alǵan kóligimen úıine aman-esen oralyp, ony tórt jyldan astam ýaqyt boıy kúndelikti kóligi retinde qoldanǵan. Alaıda 1977 jyly Taıaý Shyǵysta jumys tapqannan keıin kólikti uzaq merzimge saqtaýǵa qoıdy. Osylaısha sportkar jarty ǵasyr boıy qozǵalyssyz turyp, tozyp ketken.
— Ýaqyt óte kele men ózime ony qalpyna keltirip, qaıtadan rólge otyram degen maqsat qoıdym. Garajda jumys isteıtin adam retinde onyń osynshalyq kúıge túskenine uıaldym. Men ony satyp alý úshin kóp eńbektendim, al ony qaıta qalpyna keltirý úshin de dál sondaı qajyrly eńbek ettik, — deıdi Ýılıams.
Armanyndaǵy kólikti qaıta qalpyna keltirý úshin ol Nıýport-Pagnell qalasyndaǵy Aston Martin Works ınjenerlerine júgindi — dál osy jerde sońǵy jarty ǵasyrda brendtiń 13 myńnan astam ańyzǵa aınalǵan sportkary jasalǵan. Restavratsııa 2022 jyldyń sońynda bastaldy.
1963–1965 jyldary shyǵarylǵan 1 022 DB5 kóliginiń ishinde nebári 39-y kúmis túste, qýaty kúsheıtilgen Vantage nusqasynda jasalǵan jáne róli oń jaqta dál Ýılıamstyń kóligi sııaqty bolǵan. Bul ony bondıana jankúıerleri arasynda eń sırek ári suranysy joǵary modelderdiń birine aınaldyrady.
Kóliktiń óte nashar kúıde kelgenine qaramastan, shanaq, boıaý, ınterer jáne tarıhı qalpyna keltirý bólimderiniń sheberleri ony 2,5 myń saǵattan astam ýaqyt boıy jóndep, ony túgeldeı jańartty. Endi Aston Martin DB5 minsiz kúıge kelgen.
— Mundaı kóliktiń baǵasyn ashyq aıtý yńǵaısyz bolýy múmkin, biraq onyń tarıhy men erekshelikterin eskersek, bir kúni satylsa, quny £1 mln-ǵa deıin barýy múmkin, — deıdi Aston Martin Works basshysy Pol Spaıers.
Buǵan deıin Jańa Zelandııa turǵyny 19 000 dollar turatyn Faberje jumyrtqasyn jutyp qoıǵany habarlanǵan edi. Shekteýli serııadaǵy bul kýlon Djeıms Bond týraly «Osmınojka» fılmi sıýjetine negizdelip jasalǵan, onda qundy áshekeıler qoldan jasalǵan jumyrtqa arqyly kontrabandalanady.