Dýrov: Telegram Eýropalyq Odaq zańyn buzdy deý— ádiletsizdik

ASTANA. KAZINFORM – Telegram messendjeriniń negizin qalaýshy Pavel Dýrov ótken jazda Frantsııada ustalǵannan keıin Telegram Eýropalyq Odaq zańdaryna baǵyna bastady degen málimdemeni joqqa shyǵaratynyn Telegram-arnaǵa jazdy.

Óziniń Telegram-arnasynda jarııalaǵan habarlamasynda Dýrov frantsýz gazetiniń bul málimdemesin «jalǵan» dep atady.

— Keshe bir frantsýz gazeti meniń byltyr jazda Frantsııada ustalǵanym Telegram-dy aqyry Eýropa erejelerin saqtaýǵa májbúr etti dep jazdy. Bul — jalǵan. Sebebi Telegram árdaıym Eýroodaq zańdaryn saqtap keledi, Telegram-nyń Eýropa zańdaryn buzdy deý — ádiletsizdik, — dep jazdy ol.

Pavel Dýrovtyń aıtýynsha, onymen baılanysýdyń zańdy joldary  ol ustalmaı turyp-aq qosymsha men resmı saıtta ne bolmasa jaı ǵana Google izdeý júıesinde ‘telegram EU police’ dep terse shyǵatyn bolǵan.

— Frantsııa sottary men polıtsııasy EO zańdarynda naqty kórsetilgen osy resmı mehanızmdi nege elemegeni bizge túsiniksiz. Biraq Telegram-nyń Eýropa zańdaryn buzdy deý — ádiletsiz. Qyzyǵy, sol zańdardy elemegen — frantsýz quqyq qorǵaý organdarynyń ózi, — dedi Dýrov.

Sondaı-aq ol jalǵan aqparattyń taralýyna qarsy ekenin aıtty.

— Men Frantsııany jaqsy kóremin, onyń polıtsııasyn qurmetteımin, sondyqtan bul týraly aıtyp, eshkimdi yńǵaısyz jaǵdaıǵa qaldyrǵym kelmedi. Biraq Telegram jaıly mundaı ashyq jalǵan sózderdi de eleýsiz qaldyra almaımyn, — dedi ol.

Dýrovtyń aıtýynsha, kompanııa zań talaptaryn oryndaýǵa turaqty túrde ınvestıtsııa salyp keledi:

— Ásirese EO-da biz zań kúshine enbeı turyp, jyl buryn olardyń oryndalýyna daıyndala bastaımyz, — delingen jazbada.

Eske salaıyq, 2024 jylǵy tamyzda Pavel Dýrov Parıjde ustalyp, tórt kún qamaýda bolyp, sot aldynda jaýap berdi.

Frantsýz bıligi Telegram-dy 12 túrli quqyqbuzýshylyqqa bardy degen kúdikpen tergedi.

Ustalǵannan keıingi alǵashqy málimdemesinde Dýrov Telegram-nyń BAQ-taǵy beınesi «shynaıylyqqa múlde sáıkes kelmeıdi» dep aıtqan bolatyn.