Dúnıejúzilik kóshpendiler oıyndary: Túrkııa tas-túıin daıyn
ASTANA. KAZINFORM – Qyrkúıektiń 8-13 aralyǵynda Astanada V Dúnıejúzilik kóshpendiler oıyndary jalaýyn jelbiretedi. Dúbirli dodaǵa 80-nen astam elden 2000-nan asa sportshy qatysyp, 21 sport túrinen júldege talasady dep kútilip otyr. Olardyń qatarynda Túrkııa eli de bar.
Belgili bolǵandaı, Túrkııa Dúnıejúzilik kóshpendiler oıyndarynda 9 sport túrine qatysýǵa nıet bildirgen. Atalǵan elden 120-ǵa jýyq sportshy top jarýǵa baryn salmaq.
Esterińizge salsaq, sońǵy ret Dúnıejúzilik kóshpendiler oıyndary osydan eki jyl buryn Túrkııanyń Iznık qalasynda ótken edi. Dodany joǵary deńgeıde uıymdastyrǵan túrikter Astana qalasynda da qyzý tartys bolatynyna senimdi.
Dúnıejúzilik etnosport konfederatsııasynyń basqarma múshesi Abdýhadı Týrýstyń aıtýynsha, atalǵan jarysty ótkizýde tájirıbe jınaqtar alǵan Túrkııa qazaqstandyq áriptesterine barynsha qolǵabys kórsetip jatyr.
«Bizdi ortaq til, tarıh jáne mádenıet, dástúrler men ádet-ǵuryptar biriktiredi. Biz Astanada ótetin aýqymdy is-sharaǵa qatysýǵa daıynbyz. Óz tájirıbemizben bólisip jatyrmyz Buǵan deıin qazaqstandyq áriptestermen jıi kezdesip, daıyndyq protsesin pysyqtadyq. Dúnıejúzilik kóshpendiler oıyndary bıyl joǵary deńgeıde ótetinine senimdimiz», - dedi ol.
Dúnıejúzilik etnosport konfederatsııasynyń taǵy bir basqarma múshesi Osman Baser mundaı is-sharalar jastardy mádenıetti ǵyp tárbıeleý úshin óte mańyzdy ekenin atap ótti.
«Kóshpendiler oıyndarynda qatysýshylar sport arqyly bir-birimen tanysady. Bizdiń maqsatymyz - murany kelesi urpaqqa saqtaý. Bul turǵyda Qazaqstan óz mindettemelerin oryndaıtyny sózsiz. Sonymen qatar, Túrkııada taǵy eki halyqaralyq qurylym kóshpendiler oıyndaryna daıyndalýda. Olar – Túrki memleketteri men TÚRKSOI uıymy. Sońǵysy túrki halyqtarynyń mádenı murasyn nasıhattaý jáne túrki memleketteri arasyndaǵy mádenı-gýmanıtarlyq baılanystardy damytý úshin kórmeler men spektaklder ótkizedi», - dedi O. Baser.
Aıta keteıik, bıylǵy kóshpendiler oıyndaryna Brýneı-Darýssalam, Lıberııa, Venesýela, Irlandııa, Domınıkan, Gambııa, Brýnı, Efıopııa, Perý eliniń sportshylary alǵash ret qatysady.
