Dúnıejúzilik kóshpendiler oıyndary baǵdarlamasyna ózgerister engizildi

ASTANA. KAZINFORM –V Dúnıejúzilik kóshpendiler oıyndarynyń sporttyq baǵdarlamasy qysqartyldy. Sondaı-aq, oıyndardyń baǵdarlamasynan kórneki sport túri jarystary alynyp tastaldy. Bul týraly atalǵan is-sharany daıyndaý jáne ótkizý dırektsııasy habarlaıdy.

Premer-Mınıstrdiń birinshi orynbasary, V Dúnıejúzilik kóshpendiler oıyndaryn uıymdastyrý komıtetiniń tóraǵasy Roman Sklıardyń tóraǵalyǵymen aıtýly sharaǵa daıyndyqty qaıta pysyqtaý týraly keńes ótti.

Keńeske Sport jáne týrızm mınıstri Ermek Marjyqpaev, 5-shi Dúnıejúzilik kóshpendiler oıyndaryn daıyndaý jáne ótkizý dırektsııasynyń basshysy Naıl Nurov, Mádenıet jáne aqparat, Qarjy mınıstrligi men Astana qalasy ákimdiginiń ókilderi qatysty.

Dırektsııa basshysy Naıl Nurov oıyndarǵa daıyndyq barysy týraly, sondaı-aq QR Prezıdenti Qasym-Jomart Toqaevtyń bıýdjetti qysqartý jónindegi tapsyrmasynyń oryndalýy týraly tolyǵyraq aıtyp berdi.

Eske sala keteıik, Memleket basshysy birqatar óńirdegi sý tasqyny jaǵdaıyn eskere otyryp Úkimetke, ortalyq memlekettik jáne jergilikti atqarýshy organdarǵa ımıdjdik is-sharalardan bas tartýdy jáne alda ótetin kóshpendiler oıyndaryna jumsalatyn shyǵyndy qysqartýdy tapsyrǵan edi. 

Prezıdent tapsyrmasy boıynsha 5-shi Dúnıejúzilik kóshpendiler oıyndaryn daıyndaý jáne ótkizý jónindegi dırektsııasy sporttyq baǵdarlamaǵa ózgerister jáne usynystar engizdi.

Atap aıtqanda, oıyndar bir kúnge qysqartylyp, 8-13 qyrkúıek aralyǵynda ótedi.

«Ssırym» oıyny tolyǵymen alynyp tastaldy. «Mas-restlıngten» 4 salmaq dárejesi alynyp tastalyp, 8-i ǵana qaldy. Medaldar erler arasynda 5 salmaq dárejesi boıynsha, al áıelder arasynda 3 salmaq dárejesinde oınatylady. «Kókpar» 6 kúnnen 3 kúnge qysqartyldy. «Alyshtan» salmaq dárejeleri eki ese qysqartyldy. Sonymen qatar «Qurashtan» 3 salmaq dárejesi alynyp tastaldy. «Arqan tartys» tek 2 salmaq dárejesi boıynsha erler men áıelder arasynda ótkiziledi. 

Odan bólek, oıyndardyń sporttyq baǵdarlamasyna «Kókbóri» jáne «Koresh» qosyldy. Qyrǵyz oıyna Kókbóri olımpıadalyq júıe boıynsha 3 kún ishinde ótkiziledi. «Koresh» tatar beldik kúresi tek erler arasynda 4 salmaq dárejesinde ótedi.

Sondaı-aq, keńeste eriktilerdiń, uıymdastyrý komıtetiniń, tóreshilerdiń men qyzmetkerlerdiń kıim úlgileri tanystyryldy. 

Eske sala keteıik, V Dúnıejúzilik kóshpendiler oıyndary Astanada ótedi.