Dúnıejúzilik bank Ózbekstan halqyn áleýmettik qorǵaýǵa 100 mıllıon dollar nesıe beredi
TAShKENT. KAZINFORM – Dúnıejúzilik banktiń atqarýshy dırektorlar keńesi Ózbekstanǵa 100 mıllıon dollar jeńildetilgen nesıeni maquldady. Bul qarajat «Áleýmettik qorǵaýdy qajet etetin halyqty áleýmettendirýdi qamtamasyz etýdiń ınnovatsııalyq áleýmettik qorǵaý júıesi» («Adam») jobasyn júzege asyrýǵa qarastyrylǵan.
Jobanyń maqsaty – halyqty áleýmettik qorǵaýdy qajet etetin adamdardyń áleýmettik qyzmetterge qoljetimdiligin jáne olardyń sapasyn arttyrý, dep jazady UzA agenttigi. Jobaǵa qosymsha Dúnıejúzilik banktiń «Erte jastaǵy bilim salasyndaǵy seriktestik» kópjaqty donorlyq trast qorynyń seriktestiginiń 2 mıllıon dollar granty esebinen qarjylandyrylady. Qordyń qyzmeti álemniń ártúrli elderinde áleýmettik qorǵaýdy qajet etetin balalardy damytý men oqytýdy qamtıdy.
«Biz Ózbekstan úkimetiniń áleýmettik qorǵaýdy qajet etetin halyqty tıimdi jáne jan-jaqty qoldaý maqsatynda ulttyq áleýmettik qorǵaý júıesiniń áleýetin damytýǵa baǵyttalǵan kúsh-jigerin quptaımyz. Joba Ózbekstandaǵy «qamqorlyq ekonomıka» sektorynyń quqyqtyq jáne ınstıtýtsıonaldyq negizderin damytýǵa kómektesedi», – dedi Dúnıejúzilik banktiń Ózbekstandaǵy ókildiginiń basshysy Marko Mantovanellı.
Ol sondaı-aq myńdaǵan adamnyń, sonyń ishinde qarttardyń, múgedekterdiń, turmystyq zorlyq-zombylyq qurbandary men muqtaj balalardyń mańyzdy áleýmettik qyzmetterge qoljetimdiligin jaqsartýǵa qoldaý kórsetetinin aıtty.
Jobany Ózbekstan Prezıdenti janyndaǵy Halyqty áleýmettik qorǵaý ulttyq agenttigi memlekettik organdarmen, úkimettik emes uıymdarmen jáne áleýmettik-ekonomıkalyq damý máseleleri boıynsha halyqaralyq seriktestermen birlesip júzege asyrady. Jobanyń nátıjesinde respýblıka boıynsha kenttik deńgeıde jumys isteıtin 50-den astam áleýmettik qyzmet kórsetý ortalyqtary qurylady. Olardyń qyzmeti áleýmettik qorǵaýdy qajet etetin halyqqa baǵyttalatyn bolady. Sondaı-aq, áleýmettik qorǵaýdy qajet etetin 50 myńnan astam adam, onyń ishinde qarttar, múgedekter, áleýmettik qorǵaýdy qajet etetin balalar áleýmettik qyzmet kórsetý ortalyqtary bazasynda sapaly áleýmettik jáne ońaltý qyzmetterine qol jetkize alady.
1200 múmkindigi shekteýli jannyń kásibı biliktiligin arttyryp, jumyspen qamtý josparlanyp otyr. Onyń kem degende teń jartysy 15-24 jas aralyǵyndaǵy jastar. 29 zorlyq-zombylyq qurbanyna arnalǵan ońaltý jáne beıimdeý ortalyqtaryna júgingen barlyq áıelge sapaly quqyqtyq, medıtsınalyq, psıhologııalyq jáne basqa da kómek kórsetý josparlanyp otyr. Olar sondaı-aq kompıýterlik jáne qarjylyq saýattylyq jáne naqty kásibı daǵdylardy damytý boıynsha qysqa kýrstardyń bóligi retinde oqytylýy múmkin.
Joba ártúrli tótenshe jaǵdaılarǵa den qoıýǵa daıyndalǵan áleýmettik qorǵaýdyń ıkemdi júıesin damytýǵa yqpal etedi. Atap aıtqanda, halyqtyń áleýmettik qorǵaýdy qajet etetin toptaryn klımattyń ózgerýine beıimdeýge baǵyttalǵan memlekettik saıasat sharalary, tıisti tetikter men pılottyq baǵdarlama ázirlenetin bolady. Bul baǵdarlama klımattyń ózgerýimen baılanysty táýekelder týraly habardar bolýdy arttyrýǵa jáne olardyń saldaryna jaýap berý úshin qajetti daǵdylardy damytýǵa baǵyttalǵan aýyldyq jerlerdegi 100 000 áleýmettik osal toptaǵy azamattardy qamtıdy. Osylaısha olar klımatqa tózimdi daqyldardyń tuqymdarymen jáne aýylsharýashylyq quraldarymen qamtamasyz etiledi. Olar sondaı-aq klımatqa qolaıly aýyl sharýashylyǵy boıynsha oqytý baǵdarlamalarynan ótý múmkindigine ıe bolady.
Jobalyq is-sharalardy júzege asyrý halyqty áleýmettik qorǵaýdy qajet etetin toptardyń áleýmettik-ekonomıkalyq múmkindikterin keńeıtýge, olardyń qoǵamǵa ıntegratsııalanýyn qamtamasyz etýge, sondaı-aq olardyń ál-aýqatyn arttyrýǵa múmkindik beredi.
