Dúnıejúzilik bank Qazaqstanǵa tabys salyǵyn saralap salý tetigin engizýdi usyndy
Tabys salyǵyna birtindep progressıvti shkala engizý qajet. Qazaqstannyń bıýdjet saıasatyna taldaý jasaǵan Dúnıejúzilik bank sarapshylary osyndaı paıymǵa kelip otyr, dep habarlaıdy QazAqparat tilshisi.
Dúnıejúzilik bank sholýynda Qazaqstan Úkimetiniń salyq-bıýdjet saıasatyn jetildirip, memlekettik boryshty salystyrmaly túrde tómen qalypta ustaýǵa degen taplynysy bary aıtylǵan. Degenmen, esepte bıýdjet saıasaty aıqyn emestigi, sondaı-aq, ekonomıkany Ulttyq bank arqyly nesıelendirýdiń, Úkimet atynan qaryz tartýdyń táýekelderi bar ekeni atap ótilgen.
«Qazaqstan syrtqy jaǵdaılardyń qıyndyǵyna qaramastan, ekologııalyq ári ınklıýzıvti ósimge talpynyp otyr. Álemde paıyzdyq mólsherlemelerdiń artýy, jetkizý tizbekteriniń buzylýy, munaı baǵasynyń qubylýy, azyq-túlik baǵasynyń artýy sııaqty jaıttardan turaqsyzdyq sezinýde.
Keıingi 20 jylda Qazaqstannyń jalpy ishki ónimindegi munaıdan túsetin tabystyń úlesi ózgerissiz qalyp keldi. Bul bıýdjetti munaıǵa táýeldi etip tastady. Qazaqstannyń aldynda qazir ekiudaı mindet tur. Biri – ekonomıkany kómirsýteksizdendirý, ekinshisi – muny munaıdan tabystyń esebinen iske asyrý.
Memlekettik qarajat saıasatyn jetildirý qazirgideı qıyn kezeńde Qazaqstanǵa asa qajet», - deıdi Dúnıejúzilik banktiń Qazaqstandaǵy turaqty ókili Andreı Mıhnev.
Saparshylar salyq júıesin jetildirý, bıýdjetti josparlaýdyń sapasyn arttyrý sııaqty mindetter Prezıdent Qasym-Jomart Toqaevtyń bıylǵy halyqqa Joldaýynda da aıtylǵanyn atap ótti.
Sholý avtorlary bıýdjet jobasy 2-3 jyldyń kólemimen shektelmeı, uzaqmerzimdi josparlarǵa baǵdarlanyp ázirlenýi kerektigin aıtady. Dúnıejúzilik bank mamandary Qazaqstan bıýdjet aqshasyn bilim berý men «jasyl ekonomıkaǵa» kóbirek baǵyttaý qajettigin atap kórsetken.
«Búginde Qazaqstan Úkimeti áleýmettik shyǵystardyń toqtaýsyz ósip jatqan qajettilikterin jabý úshin bıýdjetke munaı tabysynan alynatyn aqshanyń mólsherin ulǵaıtpaqshy. Bul mindetti oryndaý úshin memlekettik kiristi basqarý saıasatyn ózgertip, salyq júıesin reformalaý kerek. Salyq rejımderi árkelki, jeńildikter de ártúrli bolǵandyqtan halyqtyń tabysynda aıyrmashylyq úlken. Salyq júıesin ádiletti etip túzetin reforma kerek», - delingen sholýda.
Dúnıejúzilik banktiń aǵa ekonomısi Samsý Rahardja Qazaqstannyń memlekettik kiris saıasatynda azamattardyń aýqatyna qaraı salyqty saralap salý saıasatyn jandandyrý qajet degen paıym aıtty.
«Salyq jeńildikterin qysqartý, túrli salyq rejımderin ońtaılandyrý, tabys salyǵyna birtindep progressıvti shakala engizý kiris jınaý jumystaryn jaqsartyp, salyq-bıýdjet saıasatyn áleýmettik turǵydan álsiz halyqqa kóbirek baǵyttaýǵa jáne klımattyń ózgerýinen keletin qubylystarǵa tótep berýge jumsaýǵa kómektesedi», - deıdi ekonomıst.
Sholýda bilim salasyn qarjylandyrýdaǵy qazirgi teńsizdikke qurylǵan júıeden qutylmasa, jalpy bilim sapasy óspeıtini, sapaly bilim tańdaýly toptardyń ǵana ıgiligi bolyp qala beretini eskertilgen.
