Dúnıejúzilik musylmandar qaýymynyń keńesi Shvetsııada Quran kitaptyń órtelýin synady

NUR-SULTAN. QazAqparat – Dúnıejúzilik musylmandar qaýymynyń keńesi Shvetsııada Quran kitaptyń órtelýin synap, dinı rámizderdi qurmetteý kerektigin, dinder men hramdardy qorlaý arqyly óshpendilikke jol bermeý qajettigin málimdedi. Bul týraly QazAqparat tilshisi Birikken Arab Ámirlikteriniń WAM jańalyqtar agenttigine silteme jasap habarlaıdy.

Dúnıejúzilik musylmandar qaýymynyń keńesi dúısenbide jarııalaǵan málimdemede Shvetsııada kórinis tapqan musylman qaýymyna degen tózimsizdik pen óshpendilik tolqyny áleýmettik yntymaqqa qaýipti qubylys ekenin aıtty. Keńes Eýropadaǵy musylmandar qaýymyn arandatý áreketterine boı urmaýǵa, Islam danalyǵynyń úlgisi bolyp, zańdardy saqtaýǵa, áleýmettik qaýipsizdik pen tatýlyqty tý etýge shaqyrdy.

Birqatar arab elderi Qurannyń kóshirmesin órtep, aktsııa ótkizgen Hard Line partııasynyń jetekshisi, saıasatker Rasmýs Palýdannyń áreketin qatań synaǵan bolatyn. Ótken beısenbide osy partııanyń músheleri birneshe qalada Quran kitapty órtegen vıdeolar taratqan edi.

Iordanııa, Saýda Arabııasy, Bahreın, Túrkııa, Katar, Pákistan, BAÁ, Mysyr jáne Oman elderi bul aktsııany «ıslamǵa degen fobııa» dep baǵalady. Al Iran men Iraktaǵy Shvetsııanyń elshileri Syrtqy ister mınıstrligine shaqyrylǵan bolatyn. Irannyń syrtqy ister mınıstrligi qalyptasqan kıkiljińge Shvetsııanyń Úkimeti jaýapty ekenin málimdep, resmı Stokgolmdi shuǵyl sharalar qabyldap, mundaı aktsııalardy tyıýǵa shaqyrdy. Al Iraktyń Syrtqy ister mınıstrligi mundaı sharalardyń «Shvetsııa men arab-musylman áleminiń arasyndaǵy qarym-qatynasqa zardabyn tıgizetinin» atady.

Onsyz da ýshyǵyp turǵan shıelenis Palýdannyń Quran kitapty kópshiliktiń kózinshe órteıtin aktsııalardyń jalǵasy bolatynyn aıtqannan keıin odan beter órshigen. Osy sózden keıin shvetsııalyq musylmandar men polıtsııa ókilderiniń arasynda qatyǵys bolyp, onyń sońy tártipsizdikterge ulasty.

Al-Bawaba aqparat portalynyń jazýynsha,

https://www.albawaba.com/node/violent-tensions-sweden-far-right-group-pledges-burn-quran-1473849

Shvetsııanyń premer-mınıstri Magdalena Andersson tolassyz tártipsizdikterge jaýap retinde Rasmýs Palýdanǵa ondaı sharalar ótkizýge tyıym sala almaıtyndaryn málim etken. Óıtkeni bul eldiń zańdary azamattary óz oıyn esh kedergisiz bildirýge múmkindik beredi.

TASS agenttiginiń málimeti boıynsha,

Rasmýs Palýdan Hard Line partııasynyń negizin 2017 jyly qalaǵan. Saıasatkerdiń ózi YouTube-tegi antııslamıstik vıdeolarymen tanymal. Ol Quran kitapty órtep turyp, muny sóz erkindigine degen qurmet dep ataǵan edi. Palýdan jetekshilik etetin partııa elde ıslamǵa tyıym salyp, Danııadan pana tapqan «batystyq emes tulǵalardyń» bárin deportatsııalaýdy talap etip júr.

Eske salsaq, Shvetsııanyń birneshe qalasynda, Pasha merekesi kezinde ýltraońshyl toptyń arandatýshylyq áreketine baılanysty tártipsizdikter oryn alǵan bolatyn.

https://kaz.inform.kz/news/shveciyanyn-birkatar-kalasynda-birneshe-kunnen-beri-tartipsizdikter-bolyp-zhatyr_a3923924