Dúnıejúzilik kóshpendiler oıyndary: Qazaq sportshylaryna qandaı jaǵdaı jasalǵan

ShOLPAN-ATA. QazAqparat - III Dúnıejúzilik kóshpendiler oıyndaryna kelgen Qazaqstan quramasyn birneshe pansıonatqa bólip jatqyzdy. At sporty boıynsha óner kórsetetin sportshylar birge turady. Olar - aýdaryspaqqa qatysatyn jigitter jáne kókparshylar. QazAqparat tilshisi olardyń jaǵdaıymen tanysyp, kúndelikti as mázirin bilip qaıtty. 

At sportynyń sheberlerin «Kógildir Ystyq kól» degen shıpajaıǵa ornalastyrdy. 3-shi korpýs Keńes zamanynan qalǵan nysan bolsa da, ishi taza ári jaryq. Árbir bólmeniń aýdany 6-7 sharshy metrden aspaıdy. Bólmede 2-3 kereýet, ústel jáne kıim iletin shkaf bar. Shıpajaıda Qazaqstan quramasynyń qarsylastary - Qyrǵystan, Ózbekstan, Aýǵanstan, Altaı jáne taǵy basqa sportshylar da jatyr.

 
Aýdaryspaqtan úsh dúrkin Azııa chempıony Birjan Qosalıevtiń aıtýynsha, Shıpajaıdyń tamaǵy jaqsy, biraq azdaý bolyp tur.

«Sanatorııde solaı ǵoı. Tamaqty kóp bermeıdi. Endi, buıyrǵany bolyp jatyr. Ash emespiz (kúldi). Biraq toımaımyz», - Birjan Qosalıev.


Birjan Qosalıev aýdaryspaqtan +90 salmaq dárejesi boıynsha óner kórsetedi. 2016 jyly ótken II Dúnıejúzilik kóshpendiler oıyndarynda ol altynnan alqa taqqan bolatyn. Sol kezde biz 90 kelige deıin de birinshi oryndy alǵan edik. 70-te de altyn medal buıyryp turǵan. Biraq tóreshiler bermedi. Ol salmaqta Ernazar Baıǵonov óner kórsetedi.

«Qudaı qalasa, osy joly birinshi oryn alý kerek. Elge abyroımen oralamyz dep úmittenemin. Ózim qazir salmaq qýyp júrmin. Tańterteń tamaq iship júrgen joqpyn. Jattyǵý jasaımyn. Túste jemis-jıdek jeımin. Salmaqty sál azaıtý qajet», - deıdi E.Baıǵonov.

 
Osy jolǵy oıyndarda aýdaryspaqtyń salmaq dárejeleri beske artyp otyr. Atap aıtqanda, 60 keli - Azamat Serǵazın, 70 keli - Ernazar Baıǵonov, 80 keli - Arman Saǵymbaev, 90 keli - Syrym Іzbasarov jáne +90 keli - Birjan Qosalıev. Aýdaryspaq boıynsha barlyq jarystar Sholpan-Atanyń ıppodromynda ótedi.

 
Aǵa jattyqtyrýshy Janbatyr Bekmusaevtyń aıtýynsha, aýdaryspaqtyń attary Qazaqstannan jetkiziledi.

«Biz tańǵy saǵat 7.00-de turamyz. Sosyn jattyǵý jasaımyz. Palýandar júgirip keledi. Sosyn jýynady da, tańǵy astaryn ishedi. 11:00-ge deıin demalys. Odan keıin qaıtadan jattyǵýǵa kirisemiz. Qazir attarymyzdy kútip otyrmyz. Búgin-erteń atpen daıyndyqty bastaımyz. Negizgi jarystar 5-7 qyrkúıek kúnderi ótedi», - dedi J.Bekmusaev QazAqparat tilshisine bergen suxbatynda.

Aýdaryspaqtyń attary Qazaqstannan jetkizilse, kókpar men jamby atýdyń attaryn Qyrǵyzstan beredi. Quramamen birge kelgen mamandar attardy qaraıdy. Sportshylar da attardy tańdaı alady.
 
Qazaqtyń sportshylary basqa korpýsta ornalasqan asxanada tamaqtanady. Búgin túski asqa qııar, qyzylsha men qyryqqabat aralas salat, nan, sorpa men kókónis qosylǵan et berdi. Desertke - qarbyz ben qaýyn.
 
Aıta keteıik, búgin keshqurym Sholpan-Atanyń ıppodromynda III Dúnıejúzilik kóshpendiler oıyndary resmı túrde ashylady.

Saltanatty sharaǵa QR Prezıdenti Nursultan Nazarbaev ta qatysady. Búgin túste Memleket basshysynyń ushaǵy Sholpan-Atanyń áýejaıyna qondy.