Dýblınde balalarǵa shabýyl jasalǵannan keıin tártipsizdikter bastaldy
Júzdegen ońshyl ekstremıst Irlandııa astanasy kóshelerine shyqty. Tártipsizdikter polıtsııamen qaqtyǵysqa ulasty. Kazinform bul týraly DW basylymyna silteme jasap habarlaıdy.
Dýblınniń birneshe aýdanynda beısenbi keshke jappaı tártipsizdik bastaldy.
Polıtsııa dereginshe, olardyń artynda ońshyl ekstremıster tur.
Brıtanııalyq Sky News agenttiginiń habarlaýynsha, polıtsııamen qaqtyǵysqa ulasqan narazylyqqa qatysýshylar sany júzdegen adamǵa jetedi.
Narazy top quqyq qorǵaý organy qyzmetkerlerine bótelka men faerler laqtyryp, birneshe avtobýs pen polıtsııa avtokóligin órtep jiberdi.
Áleýmettik jelilerde shabýylǵa ushyraǵan dúkenniń vıdeosy tarap jatyr.
Kóshelerge shyqqan adamdar antımıgranttyq urandar aıtty. Tártip ornatý úshin polıtsııa qosymsha kúsh surady, dep málim etti polıtsııa ókili RTE agenttigine bergen suhbatynda.
Tártipsizdikterge balabaqsha mańyndaǵy shabýyl sebep boldy.
Irlandııa astanasyndaǵy tártipsizdikter pyshaq ustaǵan er adam qala ortalyǵynda turǵyndarǵa shabýyl jasaǵannan keıin birneshe saǵattan soń bastaldy. Jelide shabýyldaýshy - Aljır týmasy degen aqparat jeldeı esip júr, biraq ol resmı rastalǵan joq.
Polıtsııa qylmyskerdiń ultyna qatysty aqparat berýden bas tartty.
Shabýyl kúndiz Parnell-skver-Isttegi balabaqsha mańynda boldy. Kúdikti úsh bala men olardy qorǵaýǵa tyrysqan tárbıeshini pyshaqtap ketti. Eki adam - bes jasar qyz ben 30 jastaǵy áıel aýyr jaraqat aldy. Shabýyldaýshyny polıtsııa kelgenge deıin kóshede ketip bara jatqan adamdar ustady. Ustaý kezinde onyń ózi de jaralandy.
Qylmystyń sebebi belgisiz, áýelde polıtsııa ókilderi oqıǵany terakt dep eseptemeıtinderin málim etken bolatyn. Onyń ishinde polıtsııa spıkeri Lıam Djeratı oqıǵaǵa qatysty qoǵam alańdap otyrǵanyn túsinetinin, biraq bul qaladaǵy nemese eldegi basqa máselelerge qatysy joq oqıǵa dep oılaıtynyn aıtty. Polıtsııa tártipsizdikke qatysýshylardy “ońshyl ıdeologııa qozǵap otyrǵan essiz buzaqylar toby” dep atady. Saldarynan bılik ókilderi lańkestik sıpattaǵy qasaqana shbýyl bolýy múmkin degen nusqany da qarastyryp jatqanyn málim etti.
