Dropperlik — endi qylmys: Qazaqstanda jańa bap kúshine endi
ASTANA. KAZINFORM — Qazaqstanda dropperlik úshin qylmystyq jaýapkershilik engizildi, dep habarlaıdy ІІM baspasóz qyzmeti.
— 2025 jyldyń 16 qyrkúıeginen bastap Qazaqstan Respýblıkasy Qylmystyq kodeksine dropperlik úshin jaýapkershilikti qarastyratyn jańa 232-1-baby engizildi. Bank shotyna, tólem nemese sáıkestendirý quraldaryna zańsyz qol jetkizý, ony berý nemese alý, sondaı-aq zańsyz tólemder men aqsha aýdarymdaryn júzege asyrý, onyń ishinde materıaldyq syıaqy úshin úshinshi tulǵalarǵa bank kartasyn berý áreketteri dropperlik bolyp sanalady, — dep eskertti Іshki ister mınıstrligi.
Bul áreket ınternet-alaıaqtyqtyń negizgi ádisteriniń biri jáne urlanǵan qarajatty qolma-qol aqshaǵa aınaldyrý men shyǵarý úshin qoldanylady.
Іs-árekettiń aýyrlyǵyna, sıpatyna jáne alynǵan paıda mólsherine qaraı 232-1-bap aıyppuldan bastap, múlikti tárkileı otyryp 7 jylǵa deıin bas bostandyǵynan aıyrý jazasyn qarastyrady.
Atalǵan norma kıberalaıaqtyqqa qarsy júıeli kúresti, azamattardyń qarjylyq qaýipsizdigin nyǵaıtýdy jáne tsıfrlyq ortada áreket etetin qylmystyq toptardyń qyzmetin toqtatýdy kózdeıdi.
Budan buryn Pavlodar oblysynda mal urlyǵymen aınalysqan úsh qylmystyq top quryqtalǵanyn jazdyq.