Dronmen túrmege esirtki kirgizbek bolǵandar 10 jylǵa deıin sottalýy múmkin
Joǵary qaýipsizdiktegi mekeme aýmaǵynyń ústinen ushyp ótken dron «sálemdemeni» tastap, ıesine qaıta oralǵan. Al, kezekshilikte turǵan jedel bólim qyzmetkerleri men 6506 áskerı bóliminiń sarbazdary bul jaıtty birden baıqap, tyıym salynǵan zatty der kezinde qolǵa túsirdi.
Shymkent qalasy jáne Túrkistan oblysy boıynsha qylmystyq-atqarý júıesi departamentiniń qyzmetkerleri mundaı oqıǵanyń buryn-sońdy bolmaǵanyn aıtady. Dronǵa baılanǵan zatty «tastap ketýdiń» joly sheber oılastyrylǵan. Apparatty júrgizip turǵan adam drondy ary-beri shaıqaǵan, sol kezde onyń qanattary zat baılanǵan jipti qıyp, «sálemdemeni» túsirip ketken.
«Oqıǵa ornyna shaqyrtylǵan jedel-tergeý toby oramany ashý kezinde ishinen shyqqan ózgeshe ısi bar jasyl tústi zatty sol arada saraptamaǵa jiberdi. Jedel top qyzmetkerleri dron operatorynyń kóligin baıqap, ortalyq baqylaý basqarmasynyń kameralary arqyly izine tústi. Nátıjesinde, operator men júrgizýshi turǵan úıden eki dron men ózge de zattar tárkilendi. Búgingi tańda tapsyrysty áýemen jetkizip berýshilerdiń isimen tergeýshiler aınalysyp jatyr. Olar 5 jyldan 10 jylǵa deıin bas bostandyǵynan aıyrylýy múmkin», - delingen departamenttiń baspasóz qyzmeti taratqan aqparatta.
