«Dostyq – Moıynty» temirjolynyń ekinshi jelisinde qozǵalys qarqyny qandaı
ASTANA. KAZINFORM — «Qazaqstan temir joly» UK» AQ qurylys jónindegi basqarýshy dırektory Marat Iskalıev eldegi asa mańyzdy temirjol jobasynyń ótkizý qabiletine qatysty pikir aıtty.
Aıta keteıik, qazaqstandyqtardy Jańa jylmen quttyqtaǵan Memleket basshysy Qasym-Jomart Toqaev elimizdiń 2025 jyldaǵy jetistikterin ataǵan edi. Osy oraıda Prezıdent «Dostyq – Moıynty» temirjolynyń ekinshi jelisi iske qosylǵanyn eske saldy.
- 2025 jylǵy 30 qyrkúıekten bastap «Dostyq – Moıynty» temirjol ýchaskesiniń ekinshi jelisi boıynsha poıyzdar qozǵalysy ashyldy. 2026 jylǵy 4 qańtardaǵy jaǵdaı boıynsha jańa ınfraqurylymdy paıdalaný shtattyq rejımde júzege asyrylyp jatyr. Atalǵan kezeńde jańa jolmen 1765 júk jáne 451 konteınerlik poıyz jiberildi. Bul turǵyda táýligine orta eseppen 18 poıyz ótip jatyr. Qoldanystaǵy (eski) joldarmen 1778 júk jáne 510 konteınerlik poıyz nemese táýligine orta eseppen 19 poıyz júrdi, - dedi M.Iskalıev Kazinform agenttigine bergen suhbatynda.
Onyń sózine qaraǵanda, ondaǵy qozǵalysty ashý 2025 jyldyń qańtarynan qyrkúıegine deıin kezeń-kezeńimen jekelegen ýchaskeler boıynsha júzege asyryldy. Jobany iske asyrý jeliniń ótkizý qabiletin edáýir arttyrýǵa, poıyzdardyń qozǵalys kestesin ońtaılandyrýǵa jáne júk tasymalynyń tıimdiligin arttyrýǵa múmkindik berdi.
- Joba kólik-logıstıkalyq ınfraqurylymdy damytýdyń memlekettik baǵdarlamasy aıasynda iske asyryldy jáne eldiń temirjol jelisin jańǵyrtýǵa baǵyttalǵan. «Dostyq-Moıynty» ýchaskesi Qytaıdy Eýropamen jáne Reseımen baılanystyratyn negizgi Shyǵys – Batys tranzıttik dáliziniń basty bóligi sanalady, sondaı-aq Transkaspıı halyqaralyq kólik baǵdaryna kiredi. Bul ınfraqurylymdyq joba josparlanǵan merzimnen eki jyl buryn aıaqtalǵanyn atap ótý mańyzdy, - dedi basqarýshy dırektor.
Eske salsaq, 30 qyrkúıekte «Dostyq — Moıynty» temirjolynyń ekinshi jelisi iske qosylǵanyn jazǵan edik.
Sol kezde Memleket basshysy Qasym-Jomart Toqaev «Dostyq — Moıynty» joly — shyn máninde asa mańyzdy ınfraqurylym jobasy ekenin jáne Qazaqstannyń kólik-logıstıka júıesiniń damýyna, onyń tıimdiligin nyǵaıtýǵa aıryqsha serpin beretinin atap ótti.