Doshan Joljaqsynov: Marapat adamdy ósirýi de, óshirýi de múmkin
«Men úshin búgin- erekshe kún. Eńbektiń baǵalanǵany úlken sharýa. Marapat keıde adamdy ósirýi de, óshirýi de múmkin. Sondyqtan abaı bolǵan abzal. Desekte, osynyń bári erteńgi kúniń baǵyt- baǵdaryna sebebin tıgizetinine sengim keledi. Jalpy, óner, mádenıet, ádebıet adamynyń jazǵan, túsirgen, aıtqan dúnıelerin halqy qury maqtamaı, ornymen baǵasyn berip otyrsa, óner adamynyń mereıi ústem bolady. Ónerdiń tuǵyry ol- shabyt. Oǵan kún, tún demeı izdenýiń kerek. Osynyń bári rahat ómir. Birinshiden, meniń tyrnaq aldy dúnıelerime rızashylyq bildirgen, túsinip qaraǵan kórermenderime alǵys aıtqym keledi»,- deıdi Doshan Joljaqsynov.
Sonymen qatar, ol bul jetistigi janyndaǵy shyǵarmashylyq adamdar men otbasynyń arqasy ekenin jetkizdi.
«Álemdik tendentsııada kez kelgen ult, násil óziniń tóltýmalyq tuǵyryn izdeýmen kúresip keledi. Bul qazirgi ǵasyrda aıqyn kórinýde. Bul jańa betburys dep túsinemin. Osy betburys bizdiń elde erterek bastalǵandaı. Óıtkeni Elbasymyz aıtqan «Rýhanı jańǵyrý», Qasym-Jomart Toqaevtyń Abaı týraly aýqymdy maqalasy munyń bári bizge kúsh-qýat beredi. Búgingi jetistigim janymdaǵy shyǵarmashylyq adamdarynyń úlesi, úıdegi jarymnyń, balalarymnyń úlesi dep bilemin», - dedi «Otan» ordenin ıegeri.
Aıta keteıik, bul mártebeli marapat tanymal akterge ulttyq mádenıetti, kınematografııany jáne teatr ónerin damytýdaǵy aıryqsha úlesi úshin Qazaqstan Respýblıkasynyń Prezıdenti Qasym-Jomart Toqaevtyń Jarlyǵymen berildi.
Búgin Almatyda Memlekettik hatshy Qazaqstannyń halyq ártisi Doshan Joljaqsynovqa «Otan» ordenin saltanatty túrde tabys etti.