Donald Tramptyń balalyq shaǵy ótken úı 2,3 mıllıon dollarǵa baǵalandy
ASTANA. KAZINFORM — Donald Tramptyń 4 jasqa deıin turǵan úıi satylymǵa shyǵaryldy. Baspana Nıý-Iorktiń bedeldi Jamaica Estates aýdanynda ornalasqan, dep habarlaıdy The Wall Street Journal.
Tıýdor úlgisindegi 5 bólmeli záýlim úıdi 1940 jyly Donald Tramptyń ákesi salǵan. Onyń aýdany — 232 sharshy metr. Tramp otbasy kóship ketkennen keıin bul baspananyń birneshe ıesi bolǵan.
Derekkózdiń aıtýynsha, sońǵy ıesi jyljymaıtyn múlikti jalǵa bergen, alaıda bul aıtarlyqtaı tabys ákelmedi. Bıyl úıdi ázirleýshi Tommı Lın 835 000 dollarǵa satyp aldy.
Onyń aıtýynsha, baspana turýǵa jaramsyz kúıge jetken. Ǵımarat sý men elektr qýatynan ajyraǵan. Saldarynan qubyr jarylyp, jertóle men shatyrdy zeń basyp ketken.
Shamamen 500 000 dollar turatyn kúrdeli jóndeýden keıin jalpy ınvestıtsııa 1,3 mıllıon dollardan asty. Lın qazir úıdi 2,3 mıllıon dollarǵa satýǵa qoıdy. Jalpy Jamaica Estates aımaǵyndaǵy baspanalardyń ortasha baǵasy 1,5 mıllıon dollar shamasynda.
Eske salaıyq, qazan aıynda Donald Tramp Aq úıdegi jańa ball zalyna óz atyn berýi múmkin ekeni aıtyldy.