Donald Tramp TikTok akkaýntyn ashty

ASTANA. KAZINFORM – AQSh-tyń burynǵy prezıdenti Donald Tramp qytaılyq ByteDance kontsernine tıesili TikTok áleýmettik jelisinde akkaýnt ashty. Bul týraly jeksenbi, 2 maýsymda Tramp óz akkaýntynda alǵashqy vıdeo jarııalaǵan kezde belgili boldy. Bul týraly dw.com saıty jazdy.

Vıdeo Nıýarkte ótken aralas jekpe-jek halyqaralyq Ultimate Fighting Championship (UFC) uıymy is-sharalarynyń birinde túsirilgen. Beınejazbada UFC bas dırektory Dana Ýaıt ta kórinedi. Vıdeonyń basynda ol «Prezıdent qazir TikTok-ta» dep málimdeıdi, al Tramp buǵan «úlken mártebe» dep jaýap beredi. Qysqa vıdeonyń qalǵan bóligi AQSh-tyń burynǵy prezıdentiniń trıbýnada kórermenderge qol bulǵap, olarmen birge selfı jasaǵany túsirilgen kadrlardan turady.

TikTok akkaýnty Trampqa jas aýdıtorııany, sonyń ishinde AQSh-tyń aldaǵy prezıdenttik saılaýy qarsańynda áleýetti saılaýshylardy tartýǵa kómektesýi múmkin, dep jazady Politico. 24 saǵattan az ýaqyt ishinde Tramptyń alǵashqy vıdeosy shamamen 56 mıllıon ret qaralyp, onyń akkaýntyna 3 mıllıonǵa jýyq qoldanýshy jazylǵan.

Birneshe aı buryn AQSh-tyń qazirgi prezıdenti Djo Baıdenniń saılaýaldy shtaby TikTok akkaýntyn ashty - onyń 340 myńǵa jýyq jazylýshysy bar.

Baıdenniń saılaýaldy shtabynyń TikTok-ta akkaýnty bolǵanyna qaramastan, AQSh bıligi sońǵy aılarda eldegi áleýmettik jeliniń jumysyn shekteýge tyrysty. Sáýirde Baıden Kongresstiń eki palatasy maquldaǵan zańǵa qol qoıdy. Ol áleýmettik jeliniń qytaılyq ıesin bir jyl ishinde óz bıznesin qytaılyq ıýrısdıktsııada emes kompanııaǵa satýǵa mindettedi. Áıtpese, TikTok AQSh-ta buǵattalýy múmkin.

TikTok basshylyǵy sotta AQSh bıliginiń talaptaryna qarsy kúresetinin aıtty.

Donald Tramp prezıdent kezinde AQSh-ta TikTok-qa tyıym salýǵa tyrysqan. Biraq sot onyń sheshimine tosqaýyl qoıdy.