Doktorantýraǵa qujat qabyldaý ýaqyty 5 tamyzǵa deıin uzardy

NUR-SULTAN. QazAqparat - Ulttyq testileý ortalyǵy doktorantýraǵa túsý emtıhanyna ótinish berý jáne qujat qabyldaý merzimin 5 tamyzǵa deıin uzartty, dep habarlaıdy QazAqparat.

Emtıhan kúni, ýaqyty jáne orny 9-10 tamyzda úmitkerdiń jeke kabınetiniń «meniń is-áreketim» bóliminde jarııalanady.

Al oqýǵa túsý emtıhandary 20 tamyzǵa deıin ótedi.

Esterińizge sala keteıik, bıyl doktorantýraǵa túsýge úmitkerler áńgimelesýden ótip, esse jazady, sondaı-aq oqýǵa daıyndyǵyn anyqtaýǵa arnalǵan test jáne bilim baǵdarlamasy tobynyń beıini boıynsha emtıhan tapsyrady.

Sonymen qatar doktorantýraǵa túsý úshin shet tilin jáne Qaztest júıesi boıynsha (Qaztest emtıhanyn 25 tamyzǵa deıin tapsyrýǵa bolady) memlekettik tildi meńgergenin rastaıtyn sertıfıkat bolýy mindetti.

«TOEFL ITR sertıfıkaty bar talapkerler doktorantýraǵa túsý emtıhany bastalǵanǵa deıin aǵylshyn tilinen qosymsha testileýden ótedi. Oǵan 5 tamyzǵa deıin tirkelýge bolady. Emtıhan 8 tamyzǵa belgilengen. Qosymsha testileý kúni, ýaqyty jáne ornymen jeke kabınetińizdiń «meniń is-áreketim» bóliminde tanysa alasyzdar» dep habarlady ortalyqtan.