Doktorantýra emtıhandary testileý pýnkterinde ǵana ótýi tıis - mınıstr

NUR-SULTAN. QazAqparat – Doktorantýra emtıhandary oblys ortalyqtaryndaǵy testileý pýnkterinde ǵana ótýi tıis. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Bul máseleni birneshe ret talqyladyq. Joǵary oqý oryndary máseleni biledi dep oılaımyn. Ózderińiz bilesizder, bıyl doktorantýraǵa qabyldaýdy elektrondy formatqa kóshirip jatyrmyz. Magıstratýra boıynsha ótken jyly pılottyq formatta birinshi ret elektrondy túrde ótkizgen edik. Bıyl magıstratýraǵa qabyldaý osy formatta jalǵasatyn bolady.

Al doktorantýraǵa qabyldaý alǵash ret elektrondy formatta ótedi. Bul, eń bastysy, akademııalyq adaldyq qaǵıdattaryn saqtaýǵa baǵyttalǵan. Sondyqtan jergilikti baqylaý departamentteri osy jumysty qamtamasyz etsin. Árıne, emtıhandar oblys ortalyqtarynda ornalasqan testileý pýnkterinde ǵana ótýi kerek. Osy pýnkterde ǵana testileýdi uıymdastyratyn bolamyz», - dedi Ashat Aımaǵambetov mınıstrliktiń apparat jınalysynda.

Aıta keteıik, qazirgi ýaqytta magıstýratýra jáne doktorantýraǵa qujattar Ulttyq testileý ortalyǵynyń aqparattyq júıesi arqyly qabyldanyp jatyr.

Magıstratýraǵa keshendi testileý 20 shildeden 10 tamyzǵa deıin jalǵasady. Al doktorantýraǵa túsý emtıhany 4-20 tamyz aralyǵynda ótedi.