Doktoranttardyń Scopus bazasyna maqala jarııalaýy jeńildeıtin jol ashyldy – Ulttyq quryltaı múshesi
BÝRABAI. KAZINFORM – Ulttyq quryltaı múshesi, fılologııa ǵylymynyń doktory Kárimbek Qurmanálıev Býrabaıda ótip jatqan Ulttyq quryltaıdyń paneldik sessııasynda keshe kóterilgen másele búgin sheshimin tapqanyn aıtady.
- Men ǵylym-bilim sessııasynda únemi usynys aıtyp júremin. Keshegi sessııaǵa baılanysty aıtsaq, oqýlyqtar máselesin kóterdim. Onyń ishinde joǵary oqý oryndarynyń oqýlyqtary. Qazir elimizde joǵary bilim alyp júrgen 630 myń stýdenttiń 75 paıyzy qazaq bóliminde oqıdy. Solardyń qazaq tilindegi, tól oqýlyqtarmen qamtylýy 39 paıyz ǵana. Sonda qalǵany qaı tilde bilim alyp júr? Mektep oqýlyqtarynyń bári respýblıkalyq bıýdjet esebinen basyp shyǵarylady. Joǵary oqý oryndarynyń oqýlyqtary da memleket bıýdjetinen qarjylandyrylýy kerek. Biraq onyń bári bıýdjetke salmaq túsirýi múmkin. Qazir bizde 280-deı mamandyq klassıfıkatory bar. Solardyń árqaısysyna keminde bir-bir oqýlyqty elektrondy túrde shyǵarsaq bolady. Elektrondy oqýlyqqa basyp shyǵarýdan qaraǵanda kóp shyǵyn da ketpeıdi. Taralý aýqymy da keń bolady. Osyǵan keliskendeı boldyq, - deıdi ol.
Ǵalym keshegi sessııada óziniń sońyndaǵy izbasarlary tap kelgen problemany kótergenin aıtady.
- Sheteldik reıtıngtegi jýrnaldar bazasyna maqala berý keminde 1-2 jyl ýaqyt alady. Sol sebepten doktoranttar jumysyn kesheýildep qorǵap júr. Dıssertatsııa daıyn, biraq sheteldik jýrnalda maqalasy shyqpaǵandyqtan bir jyl, eki jyl kútedi. Elimizde 250-300 shamasynda ǵylymı jýrnal bar. Solardyń arasynan konkýrs arqyly Scopus standartymen másele qaraıtyn ǵylymı jýrnaldardyń bas redaktorlar qaýymdastyǵyn qurý kerek degen usynys engizgenbiz. Búgin mınıstr súıinshiledi. Prezıdent janyndaǵy Ulttyq ǵylym akademııasynyń qasynan osyndaı qaýymdastyq qurylatyn boldy. Sonda syrtqa aqsha shashpaı, óz aramyzdan halyqaralyq talaptarǵa saı keletin jýrnaldardy aıqyndap, ǵylymı dáreje qorǵaýyn jeńildetetin múmkindik ashylady, - deıdi Kárimbek Qurmanálıev.
Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.
Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi.
Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymy ázirlenetinin aıtty.
2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.