Qonaevta Dinmuhamed Qonaevtyń 112 jyldyǵy atalyp ótti
Kórnekti memleket jáne qoǵam qaıratkeri, úsh márte Sotsıalıstik Eńbek Eri, Qazaq KSR Ǵylym akademııasynyń akademıgi, tehnıka ǵylymdarynyń doktory Dinmuhamed Qonaevtyń týǵanyna - 112 jyl. Osyǵan oraı, birtýar tulǵanyń esimi berilgen Qonaev qalasynda tarıhı tulǵany eske alý sharasy ótti, dep habarlaıdy Kazinform.
Shara D.A. Qonaevtyń eskertkishine gúl shoqtaryn qoıýmen bastaldy.
«Búgingi Dinmuhamed Ahmetuly Qonaevtyń týǵan kúni qutty bolsyn! Men ol kisiden bata alǵan adammyn. 80-shi jyldary Dinmuhamed Qonaev Sheńgeldi aýylyna kelgen edi. Ol óte kishipeıil, adamgershiligi mol, jyly júzdi kisi ekenin kórdim. Oǵan qyzmet kórsetip, kútip júrgende ol maǵan: - Qalqam, ne qyzmet jasaısyń, - dep surady. Men Sheńgeldi aýyl sovetiniń tóraǵasy ekenimdi aıttym. Ol: - Bári óz qolynda eken, baqytty bol, - dep batasyn berip ketken edi. Negizi Dinmuhamed Qonaev óte qasıetti adam boldy», - dep eske aldy Almaty oblysy aqsaqaldar alqasynyń tóraǵasy Amangeldi Besbaev.
Ol sondaı-aq aldaǵy ýaqytta Qonaev qalasynda D.A.Qonaevtyń mýzeıi ashylýy tıis ekenin aıtty.
«Almatyda, Balqash aýdanynda Dinmuhamed Qonaevtyń mýzeıi bar. Aldaǵy ýaqytta Qonaev qalasynda da mýzeıin ashý josparda bar eken. Jalpy, qalamyz oblys ortalyǵy bolǵaly beri kósheler keńeıtilip, jańa úıler salynyp, bári jańaryp, retke kelip jatyr. Qazir qalamyzda 70-80 myńdaı halyq bolsa, keleshekte 200 myńǵa jetedi dep kútiledi. Bizde sol kúndi kórsek degen úmit bar», - dedi qarııa.
Qalanyń alǵashqy qurylysshysy Aleksandr Chjen shahardyń damyp kele jatqanyn aıtty.
«Munda buryn avtobýstar júrmeıtin. Bári jaıaý júretin. Sońǵy jyldary, ásirese, oblys ortalyǵy bolǵaly beri qalamyz órkendep, ósip keledi. Záýlim úıler paıda boldy. Qalamyzda buryn 9 qabattan joǵary úıler bolmaıtyn. Qazir 12 qabatty úıler salynyp jatyr. Ótkende oblys ákimi keremet jobany kórsetti. Men jalpy qalamyzǵa Dinmuhamed Qonaevtaı dara tulǵanyń esimin bergeni úshin Prezıdentke úlken alǵys aıtamyn. Ókinishke oraı men Dımash aǵamen kezdese almadym. Alaıda, onyń boıyndaǵy qarapaıymdylyq, jaýapkershilik, aqyl men parasat-paıymy keıingi urpaq úshin óshpes ónege bolady dep senemin», - dedi ol.
Gúl shoqtaryn qoıý rásimimen soń Qonaev qalasynyń mádenıet úıinde «Taǵylymy tereń tulǵa» atty kórme ótti.
«Kitap kórmesinde Dinmuhamed Qonaevtyń óz qolymen jazǵan eńbekteri, ol kisige arnalǵan ádebıetter, fotosýretter, dáıek sózder men ınstalıatsııalar qoıylǵan. Kórmeniń maqsaty uly tulǵanyń halyqqa sińirgen eńbegin, salıhaly saıasaty men ǵıbratty ǵumyryn úlgi etý», - dedi Qonaev qalasy kitaphanasynyń bólim meńgerýshisi Іńkár Isaeva.
Eske alý sharasy «D.A.Qonaevtyń súıip tyńdaǵan ánderi» atty merekelik kontsertke ulasty. Onda Qonaev qalasy ákiminiń orynbasary Marlan Joldahmet qala turǵyndaryna quttyqtaýyn jetkizdi.
«Dinmuhamed Qonaevtyń esimi búgin de erekshe qurmetke ıe, jas urpaq maqtan tutady. Onyń ishinde, Qonaev qalasynyń turǵyndary úshin orny tipten erekshe dep oılaımyn. Qala ataýyn ıelenýi bizge eki ese mindet júkteıdi, eki ese jaýapkershilikti arttyrady. Aıtý kerek, 2023 jylǵy jeltoqsan aıynda Úkimet Qonaev qalasynyń keshendi damý josparyn bekitti. Josparǵa sáıkes, qalamyzdyń barlyq áleýmettik-ekonomıkalyq, týrıstik jáne turǵyn úı-kommýnaldyq salalaryn damytý kózdelgen. Halqymyzdyń birtýar azamaty D.A.Qonaevtyń esimi jyldar ótse de, ár qazaqtyń júreginde máńgi saqtalatyn bolady», - dedi Marlan Joldahmet.
Eske salaıyq, búgin qazaq tarıhyndaǵy eń iri tulǵalardyń biri, memleket qaıratkeri Dinmuhamed Qonaevtyń (1912-1993) týǵan kúni.
