Dneprde Qazaqstannyń konsýldyǵy ashyldy

NUR-SULTAN. QazAqparat – 6 shilde kúni Ýkraınanyń Dnepr qalasynda Qazaqstan Respýblıkasynyń Dnepropetrovsk oblysyndaǵy Qurmetti konsýldyǵynyń saltanatty ashylý rásimi ótti, dep habarlaıdy QazAqparat Ýkraınadaǵy Qazaqstan Elshiliginiń Telegram paraqshasyna silteme jasap.

Ýkraınanyń Syrtqy ister mınıstriniń orynbasary Evgenıı Enın Ýkraınanyń eń iri óndiristik óńiri – Dnepropetrovsk oblysyndaǵy Qazaqstannyń qurmetti konsýldyǵynyń ashylýy mańyzdy ekenin aıtty. Dnepropetrovsk oblysy Qazaqstan Respýblıkasymen burynnan dástúrli jaqyn qarym-qatynasta.

Qazaqstan Respýblıkasynyń elshisi Darhan Káletaev Ýkraınadaǵy Qazaqstannyń qurmetti konsýldary ınstıtýtynyń jumysyn joǵary baǵalady. Instıtýt pandemııa kezinde qıyn jaǵdaıǵa dýshar bolǵan Qazaqstan azamattaryna barynsha kómek kórsetken.

Ol qurmetti konsýldyqtyń Qazaqstan Respýblıkasynyń Tuńǵysh Prezıdenti – Elbasynyń týǵan kúninde ashylǵanynyń máni bar ekenin aıtty.

«Ol úshin Ýkraına jeri men Dnepropetrovsk oblysy – bóten jer emes. Dál osy jerde bolashaq Qazaqstan Kóshbasshysynyń eńbek joly bastalǵan», - dedi qazaqstandyq dıplomat.