Din memleketten bólek — Konstıtýtsııa jobasy
ASTANA. KAZINFORM — Elimizde alǵash Ata zańda dinniń memleketten bólek ekeni naqty jazylady. Jalpyhalyqtyq referendýmǵa shyǵarylǵan Konstıtýtsııa jobasy maquldanǵan jaǵdaıda atalǵan norma kúshine enedi.
Respýblıkalyq basylymdardy jarııalanǵan jańa Konstıtýtsııa jobasynyń 7-baby 1-tarmaǵynda «Din memleketten bólek» dep kórsetilgen. Sondaı-aq osy baptyń 2-tarmaǵynda Qazaqstan aýmaǵynda dinı uıymdardyń qyzmeti zańǵa sáıkes júzege asyrylatyny jáne ol konstıtýtsııalyq qurylys negizderin, adamnyń jáne azamattyń quqyqtary men bostandyqtaryn qorǵaý, ulttyq qaýipsizdikti qamtamasyz etý, qoǵamdyq tártipti, azamattardyń densaýlyǵy men qoǵamnyń adamgershilik bolmysyn saqtaý maqsatynda shektelýi múmkin ekeni jazylǵan.
Aıta keterligi, qoldanystaǵy Konstıtýtsııada dinge qatysty normalar birneshe bapta shashyrańqy jazylǵan. Máselen, 5-baptyń 5-tarmaǵynda sheteldik dinı birlestikterdiń Respýblıka aýmaǵyndaǵy qyzmeti, sondaı-aq sheteldik dinı ortalyqtardyń Respýblıkadaǵy dinı birlestikter basshylaryn taǵaıyndaýy Respýblıkanyń tıisti memlekettik organdarymen kelisý arqyly júzege asyrylatyndyǵy kórsetilgen. Al 14-bapyń 2-tarmaǵynda tegine, áleýmettik, laýazymdyq jáne múliktik jaǵdaıyna, jynysyna, násiline, ultyna, tiline, dinge kózqarasyna, nanymyna, turǵylyqty jerine baılanysty nemese kez kelgen ózge jaǵdaıattar boıynsha eshkimdi eshqandaı kemsitýge bolmaıtyny jazylǵan. Munan bólek, 19-bapta árkim óziniń qaı ultqa, qaı partııaǵa jáne qaı dinge jatatynyn ózi anyqtaýǵa jáne ony kórsetý-kórsetpeýge haqyly ekendigi aıtylady.
Konstıtýtsııalyq reforma jónindegi komıssııanyń 9-otyrysynda Premer-mınıstrdiń orynbasary — Mádenıet jáne aqparat mınıstri Aıda Balaeva jańa Konstıtýtsııa jobasynda din men memlekettiń ara-jigi naqty ajyratylǵanyn aıtqan edi.
Aıta keteıik, keshe Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.