D.Qonaevtyń týǵan kúni: 80 otbasy baspanaly boldy
ALMATY. KAZINFORM – Búgin – qazaq tarıhyndaǵy eń iri tulǵalardyń biri, memleket qaıratkeri Dinmuhamed Qonaevtyń týǵan kúni. Osy aıtýly kúni Qonaev qalasynda áleýmettik osal toptaǵy otbasylarǵa jáne kezekte turǵan azamattarǵa 80 páterdiń kilti tabys etildi.
Almaty oblysy ortalyǵynyń turǵyndary D.Qonaevtyń eskertkishine gúl shoqtaryn qoıdy.
Sondaı-aq mádenıet úıinde memleket jáne qoǵam qaıratkerin eske alý keshi ótti.
Sharaǵa qatysyp, D.Qonaevtyń ór tulǵaly azamat bolǵany jaıynda mańyzdy derekterge toqtaldy.
– Búgin biz úshin erekshe kún. Sebebi, dál osy kúni, 1912 jyldyń 12 qańtarynda qalamyzǵa esimi berilgen elimizdiń dańqty perzenti, memleket jáne qoǵam qaıratkeri Dinmuhamed Ahmetuly Qonaev dúnıe esigin ashty. Qonaev atamyz el basqarǵan jyldary keń baıtaq qazaq jerinde 68 jumysshylar kenti men 43 qala salyndy. Ol Іle ózeniniń boıyna bógen saldyryp, jańa sý elektr stansasynyń boı kóterýine, osy mańda jańa Qapshaǵaı qalasynyń irgetasy qalanýyna eńbek sińirdi, - dedi qala ákimi Ashat Berdihanov.
Foto: Qonaev ákimdigi
Shara barysynda áleýmettik osal toptaǵy otbasylarǵa jáne kezekte turǵan azamattarǵa 80 páterdiń kilti tabys etildi.
– Ózim kópbalaly anamyn, 7 balam bar. Úı kezeginde turǵanyma 17 jyl boldy. Búgin atamyzdyń týǵan kúninde jaqsy jańalyq bolyp, úıge qolymyz jetti. Qýanyshtymyn, – dedi úı ıesi Nazym Ahmetova.
Aıta keteıik, páterler jekeshelendirý quqyǵynsyz jalǵa berildi. Jalǵa alý quny - qoljetimdi.
Byltyr Qonaevta 85 otbasyǵa páter kilti tabystalǵan bolatyn.
Eske salsaq, QR Prezıdenti Qasym-Jomart Toqaev 2022 jyly Qazaqstan halqyna Joldaýynda Qapshaǵaıǵa Qonaevtyń esimin berý kerek dep usynys aıtsa, men bul pikirge qosylamyn degen bolatyn.
Keıin Qapshaǵaı qalalyq máslıhaty turaqty komıssııasynyń otyrysy ótip, qalaǵa Dinmuhamed Qonaev esimin berý usynysy biraýyzdan maquldandy.
Sol jyldyń mamyrynda Qapshaǵaı qalasyna Qonaev aty resmı túrde berildi.