Dızeldi lıtrin 100 teńgeden satamyn: Jalǵan jarnama bergen kúdikti ustaldy

ATYRAÝ. KAZINFORM – Atyraýlyq turǵyn 2 tonna dızeldiń lıtrin 100 teńgeden satamyn dep jalǵan jarnama bergen. Kúdiktige qatysty alaıaqtyq babymen qylmystyq is qozǵaldy.

Atyraý oblystyq polıtsııa departamentiniń baspasóz qyzmetinen málim etkendeı, kúdikti WhatsApp messendjerindegi chatta habarlandyrý jarııalaǵan.

«Tótenshe jaǵdaıǵa baılanysty WhatsApp messendjerinde ashylǵan chattardyń birinde er adam 2 tonna dızeldik otynnyń lıtrin 100 teńgeden satatyny jóninde jarnama jasaǵan. Atyraý qalasynyń 43 jastaǵy turǵyny sý tasqynyna bóget salý jumystaryna topyraq tasıtyn KamAZ júk kóligine quıý úshin satyp alýǵa kelisip, kúdiktige 100 myń teńge kóleminde aqsha aýdarǵan. Keıin aldanǵanyn bilip, polıtsııaǵa aryzdandy», - dep habarlady departamenttiń baspasóz qyzmeti. 

Osy derekke baılanysty polıtsııa departamenti kıber qylmysqa qarsy kúres tobynyń qyzmetkerleri jedel izdestirý is-sharasyn júrgizdi. Alaıaqtyq áreketine barǵan 33 jastaǵy kúdiktini ustady.

«Qazir kúdikti óz kinásin tolyq moıyndady. Kúdiktige qatysty «Alaıaqtyq» babymen qylmystyq is qozǵalyp, tergeý amaldary júrgizilip jatyr», - dep málim etti departamenttiń baspasóz qyzmetinen.

Eske sala ketelik, buǵan deıin Atyraý qalasynyń ákimi qaıtys boldy degen jalǵan aqparat taraǵanyn jazǵan edik.